Ermənistanda yeni AES tikmək üçün mütəxəssis yoxdur
Bakı, 8 fevral, AZƏRTAC
Ermənistanın yeni atom elektrik stansiyasına ehtiyacı var, lakin proses çox ləng gedir.
AZƏRTAC xəbər verir ki, bunu baş naziri Nikol Paşinyan hökumətin iclasında deyib.
"Biz qarşımıza yeni atom elektrik stansiyası tikmək vəzifəsini qoymuşuq. Lakin sabah reallıqla qarşılaşacağıq: pul var, layihə var, amma mütəxəssislərimiz olmadığı üçün tikə bilmirik. Bu məsələdə çox gecikmişik”, - deyə o bildirib.
Ermənistanda Metsamor atom elektrik stansiyasının istismarı respublika hökuməti ilə Rusiyanın “Rusatom Service” şirkətinin əməkdaşlığı sayəsində uzadılır. Müvafiq qərar ötən ilin dekabrında Ermənistan-Rusiya hökumətlərarası komissiyasının iclasından sonra qəbul edilib. Ermənistan hökuməti AES-in ikinci enerji blokunun ömrünün 2036-cı ilədək uzadılması proqramının həyata keçirilməsinə 65 milyon dollar ayırıb.
Xatırladaq ki, həddən artıq köhnəlmiş Metsamor AES region üçün ciddi təhlükə mənbəyi olaraq qalır.
Bölmənin digər xəbərləri
