Eşitmə hallüsinasiyalarının səbəbləri açılır - ARAŞDIRMA
Bakı, 24 oktyabr, AZƏRTAC
Yeni araşdırma şizofreniyada eşitmə halüsinasiyalarının (başda səslər eşitmək) beynin öz daxili səsini tanımaqda çətinlik çəkməsindən qaynaqlandığını göstərib. Yeni Cənubi Uels Universiteti (UNSW) alimlərinin apardığı tədqiqatda müəyyən olunub ki, sağlam insanlarda daxili nitq zamanı beyin xarici səsləri emal edən hissələrin fəaliyyətini azaldır. Lakin şizofreniya xəstələrində, xüsusilə tez-tez səslər eşidənlərdə, bu azalma əksinə güclənməyə çevrilir, beyin sanki səsləri “başqasından gəlirmiş kimi” qəbul edir.
AZƏRTAC “MedicalXpress” portalına istinadla xəbər verir ki, tədqiqat EEG beyin dalğası ölçmələri ilə aparılıb və iştirakçılar “bah” və “bih” kimi səsləri zehinlərində təsəvvür edərkən beyin reaksiyaları izlənilib.
Nəticələr göstərib ki, sağlam insanlarda beyin daxili nitqi proqnozlaşdırır və reaksiyanı azaldır. Səslər eşidən şizofreniya xəstələrində isə bu proses tərsinə işləyir, beyin daxili səsi xarici səs kimi qəbul edir. Alimlər bildirirlər ki, bu tapıntı şizofreniya üçün bioloji göstərici (biomarker) tapılması istiqamətində mühüm addımdır və gələcəkdə psixoz riskini erkən müəyyənləşdirməyə kömək edə bilər. Professor Tomas Vitford qeyd edib ki, bu nəticələr səsləri eşitmənin beynin öz daxili nitqini səhv tanıması ilə bağlı olduğunu indiyədək olmayan qədər aydın şəkildə göstərir.
Bölmənin digər xəbərləri
