ESTONİYADA AZƏRBAYCANA BÖYÜK MARAQ VARDIR
Qonağı səmimi salamlayan və Estoniyanın NATO və Avropa Birliyinə daxil olması ilə bağlı təbrik edən nazir Elmar Məmmədyarov, bu səfərin ölkələrimiz arasında dostluq münasibətlərinin möhkəmlənməsi üçün faydalı olacağını qeyd etmiş və Estoniyanın Azərbaycana marağının təzahürü kimi qiymətləndirmişdir.
Nazir Elmar Məmmədyarov Azərbaycanın Estoniya ilə əməkdaşlığa böyük maraq göstərdiyini və ölkələrimizin bir çox sahələrdə geniş potensiala və böyük imkanlara malik olduqlarını vurğulamışdır. O, həmçinin Azərbaycanın yaxın zamanda Baltikyanı ölkələrdə öz səfirliyini açacağı barədə qonağa məlumat vermişdir.
Estoniyanın xarici işlər naziri xanım Kristina Oculand öz ölkəsi ilə Azərbaycan arasında əlaqələrin siyasi, iqtisadi və digər sahələrdə də inkişafının, həmçinin respublikalarımızın XİN-ləri arasındakı sıx əməkdaşlığın davam etdirilməsinin zəruriliyini vurğulamışdır. O, əlaqələrin bu şəkildə inkişafının ölkələrimiz arasında əməkdaşlığın perspektivlərinə inam yaratdığını qeyd etmişdir.
Daha sonra natiq Elmar Məmmədyarov Azərbaycan Prezidenti İlham Əliyevin Belçika Krallığına son səfərinin əhəmiyyətindən, respublikamızın regionda mühüm coğrafi-strateji rolundan, TRASECA proqramında fəal iştirakından, həmçinin ölkəmizin bir sıra böyük iqtisadi layihələrdə fəaliyyətindən, o cümlədən Bakı-Tbilisi-Ceyhan neft kəmərinin, Bakı-Tbilisi-Ərzurum qaz kəmərinin inşasından, həmçinin GUÖAM təşkilatı çərçivəsində bu quruma daxil olan dövlətlərlə səmərəli əməkdaşlıqdan söhbət açmışdır.
Nazir Ermənistan-Azərbaycan, Dağlıq Qarabağ münaqişəsinə toxunaraq, işğal nəticəsində öz doğma torpaqlarından didərgin düşmüş qaçqın və məcburi köçkünlərin vəziyyəti və münaqişənin nizamlanması istiqamətində görülən işlər barədə qonağa ətraflı məlumat vermişdir.
Estoniyanın xarici işlər naziri xanım Kristina Oculand Ermənistan-Azərbaycan, Dağlıq Qarabağ münaqişəsinin tezliklə beynəlxalq birliyin səyləri nəticəsində sülh yolu ilə həll olunacağına ümid etdiyini bildirmişdir. Sonra o, öz ölkəsinin biznesmenlərinin Azərbaycana böyük maraq göstərdiklərini bildirmiş və bu il bir qrup iş adamının respublikamıza səfər etmək niyyətində olduğunu söyləmişdir.
Görüşdə, həmçinin, qarşılıqlı maraq doğuran regional və beynəlxalq məsələlər ətrafında fikir mübadiləsi aparılmışdır.
Bölmənin digər xəbərləri
