ELM VƏ TƏHSİL
FAO-nun qlobal mərkəzinin əməkdaşı Azərbaycanda aparılan etnobotaniki tədqiqatlarla maraqlanır
Bakı, 12 iyun, AZƏRTAC
Beynəlxalq Qida Elmləri İttifaqı nəzdində yerli və ənənəvi qida sistemləri və qidalanma üzrə işçi qrupunun üzvü, BMT-nin Ərzaq və Kənd Təsərrüfatı Təşkilatının (FAO) qlobal mərkəzinin əməkdaşı, Toronto Universitetinin Sosial və davranış elmləri bölməsinin fəlsəfə doktoru Zeyuan Vanq Elm və Təhsil Nazirliyinin Botanika İnstitutunda olub.
Bu barədə AZƏRTAC-a institutdan məlumat verilib. Bildirilib ki, Botanika İnstitutunun baş direktoru professor Səyyarə İbadullayeva ilə görüş zamanı qonağa elm müəssisəsinin fəaliyyət istiqaməti, aparılan etnobotaniki tədqiqatlar, beynəlxalq layihələr haqqında məlumat verilib.
Zeyuan Vanq uzun müddət Azərbaycan Respublikasında yaşayan etnik qrupların bitkilərdən istifadəsi barədə professor S.İbadullayeva ilə müzakirələr aparıb. O, yerinə yetirdiyi tədqiqatın məqsədi barədə məlumat verərkən bildirib ki, yerli icmalar və etnik qruplar arasında yerli və ənənəvi qida sistemlərində bitkilərdən istifadə, insanlar və bitkilər arasında qarşılıqlı əlaqə və mənəvi bağlılıq, bitkilərin insanların sağlamlığına təsiri kimi mövzularda araşdırma aparır. O, S.İbadullayeva tərəfindən tərtib edilmiş etnik qrupların yaşayış məskənləri barədə xəritə və onun legendasını əsas götürərək səfər müddətində Lənkəran, Zaqatala, Quba və digər bölgələrdə olan etnik qruplarla görüşdüyünü, onlar arasında sorğu keçirdiyini deyib.
S.İbadullayeva Zeyuan Vanqı maraqlandıran suallara əsasən Azərbaycanda etnik qrupların ən çox məskunlaşdığı yerlər, onların sağlamlıq üçün istifadə etdikləri qida və dərman bitkiləri, iqlim dəyişikliyinin bitkilərə təsiri, bitkilər və insanlar arasında qarşılıqlı əlaqələrin olması və s. mövzularda ətraflı məlumat verib.
Görüşdən məmnunluğunu bildirən qonaq Botanika İnstitunda əməkdaşlıq üçün geniş imkanların olduğunu vurğulayıb. Müştərək tədqiqatların aparılması və elmi əməkdaşlıq əlaqələrinin genişləndirilməsi imkanları müzakirə olunub.
Sonda qonağa etnobotaniki tədqiqatlar zamanı yığılan dərman bitkilərinə aid nümunələr təqdim olunub.