Fəlsəfə İnstitutunda Xocalı soyqırımı ilə bağlı “dəyirmi masa” keçirilib
Bakı, 26 fevral, AZƏRTAC
Fevralın 26-da AMEA-nın Fəlsəfə İnstitutunda “1918-ci il azərbaycanlıların soyqırımı və Xocalı faciəsi: müasir ideyalar və siyasət” mövzusunda “dəyirmi masa” keçirilib.
İnstitutdan AZƏRTAC-a bildiriblər ki, tədbirdə bu elm müəssisəsinin direktoru, professor İlham Məmmədzadə tarixboyu xalqımızın başına gətirilən faciələrdən, 1918-ci il və 1992-ci ildə törədilən qırğınlardan söz açıb. Qeyd edib ki, bu faciələr müxtəlif tarixlərdə olsa da, ancaq eyni düşmən tərəfindən törədilib. 31 mart və Xocalı qırğınları zamanı qocalara, qadınlara, körpə uşaqlara rəhm edilmədiyini deyən İ.Məmmədzadə bunun düşmənlərin azərbaycanlılara qarşı apardıqları qəddar siyasətin nəticəsi olduğunu vurğulayıb.
İnstitutun direktoru Xocalı soyqırımı ilə bağlı həqiqətlərin dünya ictimaiyyətinə çatdırılmasında Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq təbliğat-təşviqat kampaniyasının böyük rolu olduğunu diqqətə çatdırıb.
Sonra institutun əməkdaşları “31 mart - azərbaycanlıları soyqırımına aparan yola tarixi-siyasi nəzər”, “Xocalı faciəsi beynəlxalq hüquqi müstəvidə” və “Xocalı soyqırımına siyasi-fəlsəfi baxış” mövzularında məruzələrlə çıxış ediblər.
Bölmənin digər xəbərləri
