Fermerlərin etirazları ümumavropa hərəkatına çevrilir?
Bakı, 6 fevral, AZƏRTAC
Polşalı fermerlər öz sahələrinə aid tələblər çərçivəsindən kənara çıxan və Brüsseldə iri liberal demokratik partiyalar tərəfindən bəyənilən siyasətin aparılma üsuluna verilən reaksiyaya çevrilən genişmiqyaslı Avropa etirazlarına qoşulurlar.
AZƏRTAC xəbər verir ki, bütün Polşa üzrə 200-dən artıq yaşayış məntəqəsində fermerlər öz traktorları ilə yolları bağlayırlar. Polşa həm subsidiyalara əsaslanan Avropa aqrar siyasətinə qarşı etiraz edir, həm də Ukrayna ilə ticarətin liberallaşdırılması və bu ölkəyə Avropa İttifaqının sərt qaydalarına müvafiq olmayan ucuz kənd təsərrüfatı məhsullarının kütləvi gətirilməsi ilə bağlı burada xüsusi narazılıq yaranır.
Polşanın Baş naziri Donald Tusk hökumətin razılaşmaya nail olmaqdan ötrü səy göstərəcəyini təsdiq edib.
Polşanın fermer assosiasiyaları bütün Avropa üzrə fermer hərəkatına qoşulub. Fermerlərin etirazları milli nüanslarla bütün Avropada keçirilir və bu ilin iyununda Avropa parlamentinə seçkilərə cəmi bir neçə ay qalmış Avropa siyasi həmrəylik hərəkatının başlanğıcını qoya bilər. Fermerlər məhsulların aşağı qiymətlərinə, artan xərclərə, ucuz idxala və Aİ-nin iqlim dəyişmələri ilə mübarizə cəhdləri ilə bağlı məhdudiyyətlərə qarşı etiraz edirlər.
Narahatlıqlar ötən ay Fransada baş qaldırıb, ondan sonra Almaniyada, Belçikada, Polşada, Rumıniyada, Yunanıstanda və Niderlandda davam edib. Fermerlər avtomagistralları bağlayıb və traktor kolonnaları əsas şəhərlərdə nəqliyyatın hərəkətini pozub. İtaliyada şənbə günü 150-yə yaxın traktor Romadan şimala 1 saatlıq məsafədə yerləşən Ortedə toplaşıb. Almaniyada fermerlər Olaf Şoltsun “işıqfor” koalisiyasına narazılıqlarını ifadə edirlər. Etirazlar ötən il dekabrın 18-də başlayıb və etirazçılar indiyədək paytaxtda və bütün ölkədə yolları kəsirlər. Yüzlərlə alman fermeri dizel yanacağı ilə bağlı vergi islahatlarına etiraz əlaməti olaraq traktorlarla Frankfurt hava limanına gedən yolu bağlayıb.
Fermerlərin narahatlığına Aİ üzvü olmayan İsveçrə də qoşulub. Bu ölkədə şənbə günü 30-a yaxın traktorun yürüşü keçirilib. Bu, Avropanın digər ölkələrində başlanan hərəkatdan sonra İsveçrədə birinci belə aksiyadır.
İspaniyada fermerlərin üç əsas həmkarlar ittifaqı yaxın həftələrdə yeni aksiyaların keçiriləcəyini elan edib, fevralın 13-nə isə Barselonada böyük nümayiş planlaşdırılır.
Yunanıstanda iki minə yaxın fermer şənbə günü ölkənin ikinci böyük şəhəri Salonikidə etiraz aksiyası keçiriblər. Onlar yardımın artırılmasını tələb ediblər. Aksiya Baş nazir Kiriakos Mitsotakisin əlavə dəstək tədbirlərini elan etməsindən bir gün sonra keçirilib. Fessaliyanın dağ kəndlərindən bəzi fermerlər regionu cənginə alan təbii fəlakətlər ucbatından korlanan alma və şabalıdları tullayıblar.
Avropa Komissiyası Aİ-yə üzv ölkələrin fermerlərinin “qanuni maraqları”nın müdafiəsi üzrə tədbirlər görəcəyini vəd edib.
Bölmənin digər xəbərləri
