Fernandu Santuş: Gənc futbolçuların potensialını üzə çıxarmaq lazımdır VİDEO
Bakı, 23 may, AZƏRTAC
Hər iki oyuna yaxşı hazırlaşmalı və qələbə qazanmalıyıq.
AZƏRTAC xəbər verir ki, bu sözləri Azərbaycan futbol millisinin baş məşqçisi Fernandu Santuş Latviya və Macarıstan seçmələri ilə keçiriləcək oyunlardan əvvəl təşkil olunan mətbuat konfransında deyib.
Portuqaliyalı mütəxəssis zədə səbəbindən bir neçə oyunçunu milliyə dəvət edə bilmədiyini söyləyib: "Hər mövqedə ən yaxşıları komandaya çağırdıq. Aleksey İsayev, Coşqun Diniyev və bir neçə futbolçunu da yığmaya dəvət etmək istəyirdik. Amma zədəli olduqları üçün alınmadı. Bəzi oyunçular isə mövsüm ərzində özlərini doğrultmadıqları üçün siyahıda yer almadılar. Onlardan biri də Ramil Şeydayevdir. Bəziləri isə ümumiyyətlə, öz klublarında az-az meydana çıxırlar. Əsasən ehtiyat skamyasında əyləşirlər. Hətta bəzən onların adları iştirak ərizəsinə belə salınmır. Mən də çox oynayan futbolçuları millidə görmək istədim".
F.Santuş gənc futbolçulara şans verməyin önəmli olduğunu bildirib: "Gənclərin potensialını üzə çıxarmaq lazımdır. Onlar da digərləri kimi milli komanda ruhunu hiss etməlidirlər. Biz həmin futbolçuları təlim-məşq toplanışlarına dəvət edərək onların bacarığını yoxlayırıq".
O, Azərbaycan çempionatının səviyyəsini də dəyərləndirib: "Liqanı 10 ballıq şkala üzərindən 5 xalla qiymətləndirərdim. Təbii ki, hər məşqçi öz istəklərini reallaşdırmağa çalışır. Ümumi 10 komandadan 3-4-ü yuxarı yerlər uğrunda mübarizə aparırlar".
Qeyd edək ki, millimiz iyunun 7-də Riqada yerləşən “Skonto” stadionunda Latviya və iyunun 10-da “Liv Bona Dea Arena”da Macarıstan yığması ilə qarşılaşacaq.
Bölmənin digər xəbərləri
