Fransa Mərkəzi Bankının xəbərdarlığı: Defisit azaldılmasa, ağır nəticələr qaçılmazdır
Paris, 15 yanvar, AZƏRTAC
Fransada 2026-cı il dövlət büdcəsi hələ təsdiqlənməyib. Bu vəziyyət fonunda Fransa Mərkəzi Bankının rəhbəri Fransua Villerua de Qalo hökumət və parlamenti ciddi maliyyə riskləri barədə xəbərdar edib.
AZƏRTAC xəbər verir ki, o BFMTV-yə müsahibəsində bildirib ki, əgər bu il büdcə kəsiri 5 faizə endirilməsə, Fransa “qırmızı zona”ya daxil olacaq. O xatırladıb ki, “Banque de France” siyasi baxımdan neytraldır.
“Hazırda büdcə kəsiri ÜDM-in 5,4 faizini təşkil edir. 2029-cu ilə qədər bu göstəricinin 3 faizə endirilməsi Avropa öhdəliklərinin yerinə yetirilməsi və dövlət borcunun sabitləşdirilməsi üçün vacibdir. 2026-cı ildə defisitin maksimum 5 faiz səviyyəsində saxlanılması həm zəruri, həm də mümkündür. Lakin hazırda ölkənin təsdiqlənmiş büdcəsi yoxdur. Büdcə olmadığı müddətdə defisitin azaldılması da mümkün deyil”, – deyə o vurğulayıb.
Mərkəzi Bankın rəhbəri xəbərdarlıq edib ki, defisit 5 faizdən yuxarı qalarsa, Fransa beynəlxalq kreditorlar və maliyyə bazarları baxımından riskli zona hesab olunacaq: “Bu, Avropa İttifaqının sanksiya prosedurlarını yenidən işə salması, reytinq agentliklərinin kredit reytinqini aşağı salması və investorların bazarı tərk etməsi ilə nəticələnə bilər. Yüksək faiz dərəcələri yalnız dövlət maliyyəsinə deyil, şirkətlərin investisiya kreditlərinə və ailələrin ipoteka ödənişlərinə də mənfi təsir göstərəcək. Bu riski gözə almamalıyıq”.
Bölmənin digər xəbərləri
