Fransada parlament mövsümünün əsas gündəmi 2027-ci il büdcəsi olacaq
Paris, 1 sentyabr, AZƏRTAC
Fransanın Baş naziri Sebastyən Lökornünü parlamentdə gərgin payız gözləyir. Milli Assambleyada çoxluğa malik olmayan hökumət 2027-ci il büdcəsini qəbul etdirmək üçün müxalifət partiyaları ilə kompromis axtarmalı, eyni zamanda, senzura təhlükəsi ilə üzləşməlidir.
AZƏRTAC xəbər verir ki, parlament mövsümünün əsas gündəmi 2027-ci il büdcəsi olacaq. Hökumətin qarşısında xərcləri azaltmaq, büdcə kəsirini aşağı salmaq və vergiləri artırmamaq kimi mürəkkəb vəzifə dayanır.
Lakin müxalifət hökumətin planlarına qarşı sərt mövqe nümayiş etdirir. Milli Birlik (RN) lideri Jordan Bardella büdcə layihəsindən böyük gözləntilərinin olmadığını və heç bir variantı əvvəlcədən istisna etmədiklərini bildirib. Sosialistlər Partiyası isə layihənin Qabriel Attal və Eduard Filippin mövqelərinə uyğun hazırlanacağı təqdirdə hökuməti senzuraya məruz qoyacaqlarını açıqlayıb. “Əyilməz Fransa”nın lideri Jan-Lük Melanşon da bu mövqeyi dəstəkləyib.
Hökumət kompromis axtarır
Sebastyən Lökornü parlament üzvlərinə ünvanladığı məktubda 2027-ci il büdcəsinin prezident seçkilərindən sonraya saxlanılmasının “qarışıqlığı seçmək” anlamına gələcəyini bildirib. Baş nazir bununla əvvəlki aylarda yaşanan siyasi böhranın təkrarlanmasının qarşısını almağa çalışır.
2026-cı il büdcəsinin qəbulunda parlament çoxluğunun olmaması səbəbindən hökumət Konstitusiyanın 49.3-cü maddəsindən istifadə etmişdi. İndi isə icra hakimiyyəti yeni büdcəni ilin sonunadək qəbul etdirmək üçün müxalifət partiyaları ilə razılaşma yolları axtarır.
Büdcə layihəsi qəbul edilmədiyi təqdirdə hökumət 2025 və 2026-cı illərdə olduğu kimi, əvvəlki ilin gəlirlərinin müvəqqəti davam etdirilməsinə imkan verən xüsusi qanun qəbul etməli olacaq. Bu mexanizm 2027-ci ilin payızına qədər qüvvədə qala bilər.
Bölmənin digər xəbərləri
