Fransanın məişət texnikası qrupu iş yerlərinin ixtisarını nəzərdən keçirir
Paris, 25 fevral, AZƏRTAC
Fransanın məişət texnikası qrupu SEB rentabelliyi bərpa etmək məqsədi daşıyan qənaət planını təqdim edib. Plana əsasən, dünya üzrə 2 100-ə qədər iş yerinin ixtisarı, eləcə də Fransada könüllülük prinsipi əsasında 500 iş yerinin ləğvi nəzərdə tutulur.
AZƏRTAC xəbər verir ki, bu barədə SEB qrupu məlumat yayıb.
Bildirilib ki, bu ixtisarlar şirkətin ümumi işçi qüvvəsinin 7 faizindən az hissəsini təşkil edir. Onlardan potensial olaraq 500-ü Fransada olacaq və könüllü əsasda həyata keçiriləcək.
Şirkətin baş icraçı direktoru Stanislas dö Qramon deyib ki, əsas prioritet rentabelliyi bərpa etməkdir. Onun sözlərinə görə, Fransada istehsal sahələri bu ixtisarlardan təsirlənməyəcək və məcburi işdən çıxarmalar olmayacaq. İş yerlərinin azaldılması əsasən maliyyə, insan resursları, logistika, marketinq və məhsulun inkişafı kimi inzibati və dəstək funksiyalarını əhatə edəcək. Bu optimallaşdırma prosesində süni intellekt də rol oynayacaq.
Qeyd edək ki, ötən il qrupun dövriyyəsi 1,2 faiz azalaraq 8,17 milyard avroya düşüb. Cərimə nəzərə alınmadan hesablanan əməliyyat mənfəəti isə 25 faiz azalıb. Bu geriləmə xüsusilə Amerika Birləşmiş Ştatlarında yaşanan çətinliklər və gömrük rüsumlarının yaratdığı qeyri-müəyyən mühitlə əlaqələndirilir. Bazarda brendlərlə istehlakçılar arasında münasibətlərin ciddi transformasiyası və innovasiya dövrlərinin sürətlənməsi də şirkətin fəaliyyətinə təsir göstərib.
Bölmənin digər xəbərləri
