Gəncədə keçirilən tibbi müayinələrə Səhiyyə Nazirliyinin aparıcı mütəxəssisləri cəlb edilib
Gəncə, 6 may, AZƏRTAC
Prezident İlham Əliyevin tapşırığına əsasən 2014-cü ildən Səhiyyə Nazirliyinin müvafiq sərəncamı ilə həyata keçirilən respublika əhalisinin profilaktiki tibbi müayinələri Gəncə şəhərində uğurla davam etdirilir.
Gəncə Şəhər Səhiyyə İdarəsinin rəisi Əlikram Məmmədov AZƏRTAC-ın bölgə müxbirinə müsahibəsində bildirib ki, bu il fevralın 12-dən başlayan tibbi müayinələr ərazi poliklinikaları tərəfindən öncədən tərtib olunmuş cədvəllər üzrə həyata keçirilir.
“Ötən müddət ərzində tibbi müayinələrlə bağlı 2 dəfə - fevral ayının 23-24-də və martın 31-də Səhiyyə Nazirliyinin aparıcı mütəxəssislərindən ibarət qrupu Gəncə şəhərinə ezam olunub. Həmin mütəxəssislər tərəfindən həm Gəncə əhalisi, həm də qonşu rayonlarda qeydiyyatda olan xəstələr üçün baxış, məsləhət və konsiliumlar keçirilib”, - deyə o qeyd edib.
Mayın 5-də, həmçinin ərazi üzrə 5 saylı poliklinika tərəfindən 15 mindən çox sakinin yaşadığı Məhsəti qəsəbəsində tibbi müayinələr keçirilib.
Poliklinikanin baş həkimi Asim Kazımovun sözlərinə görə, Gəncə şəhəri 21 saylı tam orta məktəbdə təşkil olunan müayinələr zamanı 172 vətəndaş müxtəlif sahələr üzrə tibbi baxışa cəlb edilib.
“Ümumilikdə poliklinikamızın ərazisi üzrə 21mindən çox 18 yaşından yuxarı vətəndaş yaşayır. Fevralın 12-dən bu günədək artıq 16 mindən çox sakinimiz tibbi baxışlardan keçib. Onlardan 12 nəfəri tibbi müayinə və müalicə üçün Bakı şəhərinə, 104 nəfəri isə Gəncənin müxtəlif stasionar tibb müəssisələrinə göndərilib. Bu müddətdə 724 vətəndaşa ambulator müalicə təyin edilib. Qrafikə uyğun olaraq may ayının 12-nə kimi ərazilərimiz üzrə bütün vətəndaşların tibbi müayinədən keçirilməsini yekunlaşdırmağı nəzərdə tutmuşuq”, - deyə Asim Kazımov qeyd edib.
Baş həkim bildirib ki, qəsəbədə təşkil olunan profilaktiki müayinələrdə terapevt, cərrah, nevropatoloq, göz həkimi və başqa ixtisas həkimləri, səyyar rentgenoflüoroqrafik, laborator və tibbi göstəriş üzrə müxtəlif müayinələrlə yanaşı, həmçinin qadınlara mama-ginekoloji baxışlar da keçirilib.
Bölmənin digər xəbərləri
