Gəncə, 7 iyul, Rauf Hacıyev, AZƏRTAC

İyulun 7-də Əmlak Məsələləri Dövlət Komitəsi tərəfindən Gəncədə “Özəlləşdirmə: yeni yanaşmalar və imkanlar” mövzusunda forum keçirilib.

Forumda Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Gəncə “ASAN xidmət” mərkəzinin əməkdaşları və könüllüləri, həmçinin Azərbaycan Sahibkarlar Təşkilatları Milli Konfederasiyasının nümayəndələri, Gəncə-Qazax və Aran iqtisadi rayonundan olan 70-dək sahibkar, iş adamı və daşınmaz əmlak mütəxəssisləri iştirak edib.

AZƏRTAC xəbər verir ki, forumun əsas məqsədi bölgələrdə fəaliyyət göstərən sahibkarlıq subyektlərini dövlət əmlakının özəlləşdirilməsi sahəsində tətbiq olunan yeni yanaşmalar, müasir üsullar haqqında məlumatlandırmaq, həmçinin onları özəlləşdirmə prosesinin gedişi, özəlləşdirməyə çıxarılan yeni müəssisə və sahələr, özəlləşdirmənin daha da sürətləndirilməsi ilə bağlı keçirilən açıq və şəffaf hərraclar barədə maarifləndirməkdir. Eyni zamanda, investorların özəlləşdirmə prosesində iştirakının genişləndirilməsi ilə bağlı həyata keçirilən innovativ layihələr, görülən işlər barədə iştirakçıları məlumatlandırmaq da əsas vəzifələrindəndir.

Əvvəlcə özəlləşdirmə prosesindən bəhs edən videoçarx nümayiş olunub.

Əmlak Məsələləri Dövlət Komitəsinin aparat rəhbəri Azər Bəşirov çıxış edərək bildirib ki, Prezident İlham Əliyev tərəfindən ölkəmizin iqtisadi gücünün artırılması məqsədilə müxtəlif sahələrdə mühüm islahatlar həyata keçirilir. Dövlətimizin başçısı İlham Əliyevin “Dövlət əmlakının özəlləşdirilməsinin sürətləndirilməsi və idarə edilməsinin səmərəliliyinin artırılması ilə bağlı bəzi tədbirlər haqqında” Fərmanına əsasən müasir çağırışlara uyğun yeni yanaşmalar tətbiq etməklə özəlləşdirmənin sürətləndirilməsi, prosedurların elektronlaşdırılması, bu sahədə şəffaflığın, operativliyin təmin olunması prioritet məsələ kimi müəyyən edilib. Eyni zamanda, Fərmanda regionlardakı rəqabətqabiliyyətli müəssisələrin özəlləşdirilməsi, onların fəaliyyətinin yenidən bərpası, investorların prosesə cəlb edilməsi, onların özəlləşdirməyə çıxarılan müəssisələr barədə məlumatlandırılması məsələləri öz əksini tapıb. Əmlak Məsələləri Dövlət Komitəsi də sahibkarların prosesə cəlb edilməsi istiqamətində mühüm işlər görür. Bu yaxınlarda komitə ilə Azərbaycan Sahibkarlar Təşkilatları Milli Konfederasiyası arasında imzalanan memoranduma əsasən birgə əməkdaşlıq da müəssisələrin özəlləşdirilməsinin sürətlənməsinə yönəlib.

Aparat rəhbəri qeyd edib ki, Əmlak Məsələləri Dövlət Komitəsi dövlət əmlakının özəlləşdirilməsində şəffaflığın və məlumatlandırmanın təmin edilməsi, həmçinin müvafiq prosedurların sadələşdirilməsi üçün genişmiqyaslı tədbirlər həyata keçirir. Hazırda modern üsullar, innovativ layihələr tətbiq etməklə özəlləşdirmə prosesinin yeni mərhələsi başlanılıb. Özəlləşdirmənin hazırkı dövründə tətbiq olunan müasir üsullar prosesin daha da sürətlənməsinə, bu sahədə modern və çevik idarəetmənin təmin edilməsinə, operativlik və şəffaflığın artmasına şərait yaradıb.

Bildirilib ki, komitə ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi arasında imzalanan əməkdaşlıq memorandumu da bu sahədə yeni layihələrin, ideyaların, startapların tətbiqinə imkan verəcək.

Azər Bəşirov vurğulayıb ki, dövlət mülkiyyətində olan dövrlə müqayisədə, özəlləşdirilmiş müəssisələrdə istehsalın həcmi 1,5 milyard manat artıb, çoxlu çeşiddə rəqabətqabiliyyətli və ixracyönümlü məhsulların istehsalı təşkil edilib. Prezident İlham Əliyevin 2016-cı il 19 iyul tarixli Fərmanına əsasən, orta müddətli dövr ərzində dövlət mülkiyyətində saxlanılacaq dövlət müəssisələrinin siyahısı təsdiq olunub. Onların tabeliyindəki qeyri-profil, habelə həmin siyahıya daxil olmayan dövlət müəssisə və obyektləri özəlləşdirməyə açıq elan olunub. Bundan başqa, müvafiq siyahıda adı çəkilməyən 300-dən artıq yeni müəssisə də özəlləşdirməyə açıq elan edilib. Hazırda komitə tərəfindən həmin müəssisələrin özəlləşdirməyə çıxarılması istiqamətində işlər görülür, yaxın aylarda onların özəlləşdirilməsi barədə elan veriləcək.

Diqqətə çatdırılıb ki, hazırkı mərhələdə özəlləşdirilən dövlət əmlakı müstəqil qiymətləndiricilər cəlb olunmaqla bazar prinsipləri əsasında qiymətləndirilir və açıq hərraclar vasitəsilə özəlləşdirməyə yönləndirilir. Yeni yanaşmalara uyğun olaraq, 40-a yaxın hərrac keçirilib, 110-dan artıq dövlət əmlakı satışa çıxarılıb. Özəlləşdirmə portalı vasitəsilə həmin əmlaklar barəsində məlumatlar təqdim olunur. Artıq portaldan istifadə edənlərin sayı 700 mini ötüb.

Bildirilib ki, bundan sonra özəlləşdirilən istehsal təyinatlı müəssisələr, əsasən investisiya müsabiqələri vasitəsilə özəlləşdiriləcək. Bu zaman isə potensial alıcılardan investisiya proqramının icra olunması tələb ediləcək.

Daha sonra Gəncə Şəhər İcra Hakimiyyəti başçısının müavini Rafiq Şəfiyev çıxış edərək bildirib ki, son dövrlər ölkədə, eləcə də Gəncə şəhərində investor kütləsinin formalaşması, əcnəbi və yerli sahibkarlar tərəfindən müəssisələrə yatırılan kapitalın artımı özəlləşmə prosesinin sürətlənməsinin əyani göstəricisidir. Həmçinin investorların cəlb edilməsi və bu sahənin daha da inkişafı üçün Gəncədə geniş imkanlar mövcuddur.

Azərbaycan Sahibkarlar Təşkilatları Milli Konfederasiyasının vitse-prezidenti Vüqar Zeynalov bütün bölgələrimizdə investisiya yatırımları üçün münbit şəraitin olduğunu, hazırda özəlləşmə prosesinə sahibkarların marağının artdığını vurğulayıb.

Vüqar Zeynalov deyib ki, özəlləşdirmə ilə bağlı keçirilən hərraclar prosesin sürətlənməsinə şərait yaradıb. Açıq və şəffaf keçirilən hərraclar investorların özəlləşdirməyə çıxarılan əmlaklara əlçatanlığını artırıb.

Forumda Gəncə-Qazax və Aran iqtisadi rayonlarında özəlləşdirilməsi nəzərdə tutulan 50-ə yaxın müəssisənin iqtisadi, texniki və digər göstəriciləri barədə ətraflı məlumat verilib.

Bildirilib ki, bunlardan 18-i Gəncədə, 7-si Yevlaxda, 6-sı Mingəçevirdə, 5-i Şəmkirdə, qalanları isə digər bölgələrdə yerləşir. Bu müəssisələr sənaye, kənd təsərrüfatı, xidmət və digər iqtisadi sahələrə aiddir.

Forumda özəlləşdirmə prosesində daha bir yenilik olan dövlətə məxsus daşınar əmlakların özəlləşdirilməsini həyata keçirən elektron hərrac barədə də məlumat verilib. Bildirilib ki, elektron hərrac vasitəsilə ölkə vətəndaşları və iş adamları dünyanın istənilən nöqtəsindən özəlləşdirmə hərraclarına onlayn qoşulub dövlət əmlakının özəlləşdirilməsində iştirak edə bilər. Komitə tərəfindən həyata keçirilən bu kimi innovativ layihələr ölkəyə daha çox investorun cəlb edilməsinə, özəlləşmə prosesində əlçatanlığın artmasına, investisiya mühitinin formalaşmasına istiqamətlənib.

Sonda özəlləşdirmə prosesi ilə bağlı sahibkarları maraqlandıran çoxsaylı suallar komitə nümayəndələri tərəfindən cavablandırılıb.