Gənclər regionlarda kənd təsərrüfatının inkişafı ilə bağlı müzakirələr aparacaqlar
Bakı, 17 noyabr, AZƏRTAC
“Respublika Gənclər Debat Forumu-2015: Payız Kuboku” layihəsi çərçivəsində gənc debatçılar kənd təsərrüfatının inkişafında liberal bazar iqtisadiyyatının rolu haqqında debatlar aparacaqlar.
Vətəndaş Cəmiyyətində Debat İctimai Birliyindən (DVC İB) AZƏRTAC-a bildiriblər ki, Bakı, Sumqayıt, Gəncə, Şəki, İsmayıllı, Qusar, Lənkəran, Mingəçevir, Şəmkir və Sabirabadda keçiriləcək forumlarda 600-ə yaxın gənc iştirak edəcək.
Forumların məqsədi “Kənd təsərrüfatı ili” çərçivəsində gənclərin sözügedən mövzuda məlumatlılığını artırmaq, ölkəmizdə kənd təsərrüfatının dinamik inkişafı üçün zəmin yaradılmasına dəstək olmaqdır.
Rayon və şəhərlərin təhsil müəssisələrində “Kənd təsərrüfatının inkişafında liberal bazar iqtisadiyyatı labüddür” mövzusunda müzakirələr aparılacaq. Regional forumların qalib komandaları dekabrın 19-20-də Bakıda keçiriləcək forumun yekun mərhələsində öz regionlarını təmsil edəcəklər.
“Respublika Gənclər Debat Forumu-2015: Payız Kuboku” layihəsi DVC-nin Milli Debat Proqramı çərçivəsində Gənclər və İdman Nazirliyinin və Azərbaycan Respublikasının Prezidenti yanında Gənclər Fondunun dəstəyi ilə təşkil olunur.
Bildirilib ki, DVC-nin aparıcı və ən kütləvi proqramlarından biri olan “Milli Debat Proqramı” gənclərin maariflənməsi və intellektual gənclər şəbəkəsinin yaradılması məqsədi daşıyır. Proqram vasitəsilə gənclərə debat metodologiyası, sosial aktivlik, digər bilik, bacarıq və dəyərlər aşılanılır.
Proqram respublikanın 45 rayonunu və bütün böyük şəhərləri əhatə etməklə, 11 regional nümayəndəlik/mərkəzi özündə birləşdirir. Bu günə qədər Milli Debat Proqramı çərçivəsində həyata keçirilən tədbirlərdə 40 mindən çox gənc iştirak edib.
Bölmənin digər xəbərləri
