GORANBOYDA YÜK QATARI HƏRBİ TEXNİKA İLƏ TOQQUŞMUŞDUR

24.05.2006 [20:53]
Çap et
A⁺ A^-

AZƏRTAC-ın müxbiri xəbər verir ki, mayın 24-də saat 11 radələrində Gəncə-Bakı istiqamətində hərəkət edən yük qatarı Goranboyun Zazalı stansiyası yaxınlığında hərbi texnika ilə toqquşmuşdur. Hadisə nəticəsində 59 vaqondan 10-u relsdən çıxaraq aşmış, nəticədə həm vaqonlara, həm də hərbi texnikaya xeyli ziyan dəymiş, 6 nəfər hərbçi müxtəlif dərəcəli bədən xəsarəti almışdır. Hərbçilərdən 4-ü Gəncə hərbi hospitalında, hadisə nəticəsində ayağını itirən və beyin zədəsi alan digər iki hərbçi isə yaxınlıqdakı Samux rayon xəstəxanasına yerləşdirilmişlər.

Gəncə dəmir yolu idarəsinin rəis müavini Füzuli Kərimovun verdiyi məlumata görə, hərbi texnikanın qorunmayan dəmir yolu keçidində hərəkəti üçün dəmir yolu idarəsinə əvvəlcədən məlumat verilməli idi. Lakin bu xəbərdarlığın olunmaması nəticəsində ərazidə təhlükəsizlik tədbirləri görülməmiş və nəticədə qəza baş vermişdir.

Hazırda faktla bağlı hərbi və mülki hüquq mühafizə orqanları təhqiqat aparırlar.