Görkəmli tarzən Əkrəm Məmmədlinin 80 illik yubileyi qeyd olunub
Naxçıvan, 11 yanvar, AZƏRTAC
Naxçıvan Dövlət Milli Dram Teatrında Naxçıvan Dövlət Universiteti və muxtar respublikanın Mədəniyyət Nazirliyinin birgə təşkilatçılığı ilə universitetin Konservatoriyasının müəllimi, Prezidentin fərdi təqaüdçüsü, Əməkdar mədəniyyət işçisi, görkəmli tarzən Əkrəm Məmmədlinin 80 illik yubileyi qeyd olunub.
NDU-nun media və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, tədbirdə universitetin professor-müəllim heyəti, incəsənət xadimləri və qonaqlar iştirak ediblər.
Naxçıvan Dövlət Universitetinin İncəsənət fakültəsinin “Xalq çalğı alətləri” kafedrasının kamança müəllimi Bənövşə Rzayeva ustad tarzən Əkrəm Məmmədliyə həsr etdiyi şeiri səsləndirib. Ardınca videoformatda Əkrəm Məmmədlinin ifasında "Orta Mahur" muğamı təqdim olunub.
Naxçıvan Dövlət Universitetinin rektoru Elbrus İsayev ustad tarzən Əkrəm Məmmədlinin Azərbaycan musiqi mədəniyyətindəki əvəzsiz rolunu yüksək qiymətləndirib. Qeyd edilib ki, görkəmli tarzən Azərbaycan musiqisinin inkişafında misilsiz xidmətlər göstərir, həm ifaçı, həm də Naxçıvan Dövlət Universiteti Konservatoriyasının müəllimi kimi yeni nəsil musiqiçilərin yetişməsində xüsusi rol oynayır.
Rektor vurğulayıb ki, Əkrəm Məmmədlinin sənəti Azərbaycan musiqisinin zənginliyini dünyaya tanıdan ən dəyərli nümunələrdən biridir. O, təkcə ifaçılığı ilə deyil, pedaqoji fəaliyyəti ilə də musiqi irsimizin gələcək nəsillərə çatdırılmasında əvəzsiz xidmətlər göstərib. Rektor tarzənin sənətə olan sevgisi və fədakarlığının onu musiqi dünyasında ölməz bir sima etdiyini və belə tədbirlərin sənətkarların irsinin yaşadılması və təbliği baxımından əhəmiyyətini diqqətə çatdırıb.
Elbrus İsayev yubilyara elmi-pedaqoji fəaliyyətində yeni uğurlar arzulayıb, ona universitetin fəxri fərmanını və İncəsənət fakültəsi tələbələrinin hazırladığı əl işini təqdim edib.
Naxçıvan Muxtar Respublikası mədəniyyət nazirinin müavini, nazir vəzifəsini müvəqqəti icra edən Həsən Seyidov bildirib ki, Əkrəm Məmmədli mahir pedaqoq, musiqi təşkilatçısı, milli musiqimizin incəliklərini dərindən anlayan musiqi xadimi, hörmətlə anılan yaşlı nəsil nümayəndələrindən biridir.
Sonra ustad tarzənə Mədəniyyət Nazirliyinin fəxri fərmanı və hədiyyəsi təqdim olunub.
Azərbaycan Respublikası Milli Məclisinin deputatı, akademik Rafael Hüseynov videoformatda yubilyarın həyat və yaradıcılığı haqqında fikirlərini bölüşüb.
Azərbaycan Respublikasının Xalq artistləri - Ağaverdi Paşayev, Vamiq Məmmədəliyev, Şəfiqə Eyvazova, Ağasəlim Abdullayev, Möhlət Müslümov, Malik Mansurov, Vasif Allahverdiyev, Azərbaycan Respublikasının Əməkdar incəsənət xadimi Nazim Kazımov, professor Arif Əsədullayev, Azərbaycan Respublikasının Əməkdar artisti Tariyel Abbasov, həmçinin Naxçıvan Muxtar Respublikası Həmkarlar İttifaqları Şurası sədrinin müavini Xatirə İbrahimli və başqaları Əkrəm Məmmədlinin sənət yolundan, Azərbaycan və Naxçıvan musiqi mədəniyyətinin inkişafındakı xidmətlərindən söz açıb, hədiyyələrini təqdim ediblər. Qeyd olunub ki, Əkrəm Məmmədli 50 ildən çoxdur ki, tar ifaçılığı və onun tədrisi ilə məşğul olur.
Tədbirdə musiqilər səsləndirilib.
Ustad tarzən Əkrəm Məmmədlinin oğlu Kənan Məmmədli və əmisi oğlu Səfər Əliyev sənətkarın zəngin irsi və musiqiyə verdiyi töhfələrlə ailələrinin qürur duyduğunu qeyd ediblər. Onlar Əkrəm Məmmədlinin sənət və pedaqoji fəaliyyətinin hər zaman böyük hörmət və ehtiramla xatırlandığını vurğulayıblar.
Sonda yubilyar əməyinə və yaradıcılığına yüksək qiymət verildiyi üçün minnətdarlığını bildirib.
Bölmənin digər xəbərləri
