GUAM ÖLKƏLƏRİNİN GƏNCLƏR TƏŞKİLATLARI FORUM YARATMIŞLAR

22.05.2006 [21:35]
Çap et
A⁺ A^-

AZƏRTAC Ukrinforma istinadla xəbər verir ki, mayın 22-də Kiyevdə Gürcüstan, Azərbaycan, Moldova və Ukraynanın gənclər təşkilatları GUAM ölkələri gənclərinin Beynəlxalq forumunu yaratmış və yeni təşkilatın Nizamnaməsini imzalamışlar. Bunu mətbuat konfransında Təşkilat Komitəsinin sədrləri Viktor Belov (Ukrayna), Fərhad Hacıyev (Azərbaycan), David Kakabidze (Gürcüstan), Andrey Çyornı (Moldova) bildirmişlər.

Yeni qurumun əsas məqsədləri gənclər forumunun üzvlərini dövlət hakimiyyəti və yerli özünüidarə orqanlarının işinə cəlb etməkdən, gənclərin təşəbbüslərini dəstəkləməkdən, dövlətin aktual problemlərinin həllində gənclərin iştirakı üçün şərait yaratmaqdan və gənclər üçün məqsədli kompleks proqramları həyata keçirməkdən ibarətdir.

Təşkilatın iqamətgahı yaxın iki ildə Kiyevdə olacaq, sonra isə eyni müddətə Kişinyova köçəcəkdir.