Güclü “Haishen” tufanı Yaponiyanın cənubuna yaxınlaşır
Tokio, 4 sentyabr, AZƏRTAC
Yaponiya Meteorologiya Agentliyinin yaydığı məlumata görə, güclü “Haishen” tufanının sentyabrın 5-dən 6-na keçən gecə Kyuşü adasına çatacağı gözlənilir.
AZƏRTAC Yaponiya KİV-lərinə istinadla xəbər verir ki, bununla əlaqədar agentlik sakinləri hazırlıq tədbirlərini sürətləndirməyə çağırıb.
Bildirilir ki, cümə günü Yaponiyanın cənubunda Sakit okean üzərində olan tufan qərb və şimal-qərb istiqamətində hərəkət edib. Tufanın mərkəzində küləyin sürətinin saatda 180 kilometrdən çox olduğu, arabir saatda 252 kilometrə çatdığı qeyd edilir.
Sinoptiklərin proqnozlarına görə, tufanın daha da güclənəcəyi və şimal istiqamətində hərəkət edərək şənbə günü Okinava prefekturasının Daytocima regionuna yaxınlaşacağı gözlənilir.
Okinavada küləyin sürətinin saatda 180 kilometrə çatacağı, adaların sahillərində dalğaların 13 metr hündürlüyə qalxacağı proqnozlaşdırılır.
Rəsmi nümayəndələrin bildirdiyinə görə, “Haishen” Kyuşü regionunun Amami adalarına bazar günü axşam saatlarında çatacaq. Burada küləyin sürətinin saatda 288 kilometrə çatacağı gözlənilir.
Sinoptiklər yerli əhalini leysan yağışlarına, güclü qasırğa və torpaq sürüşmələrinə qarşı ehtiyatlı olmağa çağırırlar.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
