Gürcüstan AŞPA qarşısında şərt irəli sürüb
Tbilisi, 16 may, AZƏRTAC
Gürcüstan parlament nümayəndə heyəti Avropa Şurası Parlament Assambleyasına (AŞPA) qayıtmağa hazırdır. Amma bunun üçün AŞPA Gürcüstan Parlament nümayəndə heyətinin mandatını qeyd-şərtsiz tanımalıdır.
Bu sözləri AZƏRTAC-a müsahibəsində Gürcüstan Parlamentinin Xarici Əlaqələr Komitəsinin sədri, hakim “Gürcü Arzusu-Demokratik Gürcüstan” partiyasından olan deputat Nikoloz Samxaradze söyləyib: “Bizim mövqeyimiz çox qətidir. AŞPA heç bir ilkin şərt olmadan Gürcüstan nümayəndə heyətinin mandatını tanımağa hazırdırsa, o zaman Gürcüstan nümayəndə heyətinin geri qayıtması üçün başqa maneə yoxdur. Bizim tələbimiz odur ki, Gürcüstan nümayəndə heyətinin mandatları qeyd-şərtsiz tanınsın”.
Onun sözlərinə görə, AŞPA-nın qərarının mətnində gürcü nümayəndə heyətinin mandatının tanınması şərtləri məcburi kimi formalaşdırılıb, lakin sonradan Assambleyanın prezidenti onları yalnız tövsiyələr adlandırıb.
Qeyd edək ki, bu il yanvarın 29-da AŞPA Gürcüstan hakimiyyətinin şərtləri yerinə yetirməməsi, o cümlədən Gürcüstan parlamentinə növbədənkənar seçkilərin təyin edilməsi halında fəaliyyətinin dayandırılması şərti ilə Gürcüstan nümayəndə heyətinin səlahiyyətlərinin tanınmasına səs verib. Buna cavab olaraq Gürcüstan nümayəndə heyəti Assambleyada işləməkdən imtina edib və onun nümayəndə heyətinin üzvlərini AŞPA-dan geri çağırıb.
AZƏRTAC-ın xüsusi müxbiri
Tbilisi
Bölmənin digər xəbərləri
