Gürcüstan fevralın 1-dən beynəlxalq aviareysləri bərpa edəcək
Tbilisi, 22 yanvar, AZƏRTAC
Gürcüstan beynəlxalq avia uçuşları fevralın 1-dən bərpa edəcək. Bu zaman COVID-19 virusu ilə əlaqədar bütün təhlükəsizlik tədbirlərinə və tibbi protokollara tam riayət olunacaq.
AZƏRTAC xəbər verir ki, bu barədə Gürcüstanın iqtisadiyyat və davamlı inkişaf naziri Natiya Turnava deyib.
Onun sözlərinə görə, hökumət müxtəlif ölkələrdən Gürcüstana gəlmək istəyən xarici vətəndaşlara tətbiq olunan qadağaların da yumşaldılması məsələsini nəzərdə keçirir. Bu yumşaldılma ilk növbədə Avropa İttifaqına üzv dövlətlərin, İsrail və Körfəz ölkələrinin vətəndaşlarına tətbiq olunacaq.
Nazir Gürcüstanın artıq yay aylarında bütün ölkələrdən turistləri qəbul edə biləcəyini bildirib.
Qeyd edək ki, Gürcüstan 2020-ci ilin mart ayından bütün beynəlxalq avia uçuşlara qadağa qoyub. Hazırda Gürcüstandan yalnız Berlin, Münhen, Paris, Riqa, Amsterdam, Afina, Varşava, Vilnüs, Dortmund, Doha və Milan şəhərlərinə aviareyslər həyata keçirilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
