Gürcüstan polisi qara bazarda dəyəri üç milyon lari olan narkotik maddəni müsadirə edib
Tbilisi, 17 yanvar, AZƏRTAC
Gürcüstan Daxili İşlər Nazirliyinin Mərkəzi Cinayət Polisinin Acarıstan Baş İdarəsinin əməkdaşları xüsusi əməliyyat nəticəsində altı kiloqrama qədər "Metadon" narkotik maddəsi müsadirə ediblər. Bu narkotik maddənin qara bazarda qiyməti üç milyon lariyə qədərdir.
AZƏRTAC xəbər verir ki, bu barədə Gürcüstan DİN məlumat yayıb.
Bildirilib ki, Belarus Respublikasının iki vətəndaşı xüsusilə külli miqdarda narkotik vasitələrin qanunsuz alınmasına, saxlanmasına və satışına kömək etmək ittihamı ilə həbs edilib.
İstintaq nəticəsində polis narkotik maddələrin qablaşdırılması üçün lazım olan materialları da müsadirə edib.
Faktla bağlı araşdırma aparılır, saxlanılan şəxsləri 20 ilədək və ya ömürlük azadlıqdan məhrumetmə cəzası gözləyir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
