GÜRCÜSTAN PREZİDENTİ MİXAİL SAAKAŞVİLİNİN BƏYANATI
-Hörmətli cənab Prezident İlham Əliyev!Hörmətli cənab Baş nazir Rəcəb Tayyib Ərdoğan!
Hörmətli qonaqlar!
Mən sizin hamınızı burada, Gürcüstanın paytaxtı Tbilisi şəhərində salamlamaq istəyirəm. Bu, bizim həyatımızda çox mühüm bir gündür. Ümumiyyətlə, regionun tarixində mühüm bir mərhələdir. Bu gün biz Tbilisi Bəyannaməsini imzalayacağıq, bundan başqa, Bakı-Tbilisi-Qars dəmir yolu tikintisinin layihəsinin artıq başlanması ilə bağlı sazişi imzalayacağıq.
Biz bilirik ki, regionumuzda digər vacib layihələr də nəzərdə tutulur və gələcək üçün böyük layihələr də var. Lakin həmin layihələr arasında bu layihə adi insanların, vətəndaşların, xalqlarımızın həyatının daha da yaxşılaşdırılması üçün ən vacib bir layihədir. Bu layihə bizim üçün iki siyasi məna daşıyır və ümumiyyətlə, tamamilə strateji baxımdan yeni bir durumun formalaşmasına zəmin yaradacaq, üç ölkəni bir-birinə daha da yaxınlaşdıracaqdır. Bir tərəfdən, Mərkəzi Asiya, Çin, digər tərəfdən, Avropa bu məkanda qovuşacaqlar. Biz artıq yeni mərhələnin başlanmasından danışa bilərik. Bunu İpək yolunun bərpası layihəsinə də aid etmək olar. Bu o deməkdir ki, layihə hər bir ölkə üçün fayda gətirəcək, həmçinin tərəfdaşlarımız üçün də xeyirli olacaqdır. Hazırkı layihə bizim gələcəkdə atacağımız addımların uğurunun əsas şərtidir. Hər üç ölkə əlindən gələni əsirgəməyəcək, yük daşımalarını davam etdirəcəkdir.
Bundan sonra ölkəmizin dəmir yolu xətləri Avropanın dəmir yolu şəbəkəsinə qoşulmaq imkanı əldə edəcəkdir. Nəinki ölkəmizdən, eyni zamanda, regionumuzdan, o cümlədən Mərkəzi Asiyadan daşınan malların ərazimizdən keçməsi üçün imkan yaranacaqdır. Bir sözlə, bu layihənin gerçəkləşməsi ümumi baxımdan coğrafi vəziyyətə də yenilik gətirəcəkdir. Biz artıq keçmişdə yaşadığımız günləri keçmişdə qoyaraq, gələcək dövrə nəzər salırıq. Gürcüstan layihənin tam lazımi səviyyədə həyata keçirilməsi üçün bütün işləri yerinə yetirəcəkdir.
Bizim Türkiyə ilə sərhədimiz ən şəffaf sərhəddir. Bu illər ərzində demək olar ki, 1,5 milyon şəxs həmin sərhədi keçmişdir. Bizim Türkiyə ilə xüsusi viza rejimimiz vardır və bu, daha asanlaşdırılmış qaydada həyata keçirilir. Bundan əlavə, biz bu layihənin həyata keçirilməsindən sonra əldə olunacaq nəticələrdən üç ölkədə eyni qaydada, eyni dərəcədə istifadə edə biləcəyik.
Bu il İstanbul-Batumi xətti də çəkiləcəkdir. Çox yüksək standartlara cavab verən yol olacaq və bu, o deməkdir ki, adi vətəndaşlar Tbilisidən səhər-səhər öz maşınlarına əyləşib, rahat şəkildə istədikləri ünvana çata biləcəklər. Eyni zamanda, biz Tbilisidə qatara minərək, heç bir qatar dəyişməyərək, birbaşa Fransaya və digər Avropa ölkələrinə gedə biləcəyik.
Gürcüstanın Azərbaycan və Türkiyə ilə birgə uğurlu əməkdaşlığı nəticəsində, Azərbaycan hökumətinin yorulmaz səyləri nəticəsində bu il ərzində alternativ qaz mənbəyi hesabına ölkəmiz mavi yanacaqla təmin olundu və bu, bizim üçün müstəsna xarakter daşıyan mənbədir. Yadımdadır, biz hansı böyük çətinliklərlə üzləşmişik. İndi isə biz bu çətinlikləri aradan qaldırmaqdayıq. Bildiyiniz kimi, ötən il Gürcüstan elektrik enerjisindən və qazdan məhrum olmuşdu, Azərbaycan bizim köməyimizə gəldi, qışın nə qədər soyuq olmasına baxmayaraq, Azərbaycan bizə öz yardım əlini uzatdı, Gürcüstanı enerji ilə təchiz etdi. Biz bunu heç vaxt yaddan çıxarmayacağıq. Bu, bizim ölkələrimiz arasındakı dostluğun bir nümunəsidir. Ona görə Azərbaycan qəbul etdiyi qərarı yerinə yetirdi və Gürcüstana qaz verdi. Bu qərarın qəbul edilməsi olduqca böyük cəsarət tələb edirdi. Bildiyiniz kimi, təbii qazın qiymətləri təkcə Gürcüstan üçün yox, eyni zamanda, Azərbaycan üçün artırılmışdır. Azərbaycana qaz verən şirkətin hansı addımlar atdığı məlumdur. Qazın qiyməti artırıldıqdan sonra, çətinliklərə baxmayaraq, Azərbaycan buna müqavimət göstərə bildi, müstəqil şəkildə öz qərarını qəbul etdi. Gürcüstan bunu heç vaxt yaddan çıxarmayacaqdır. Bax, biz bu yolla öz dostluğumuzu sınaqdan keçiririk. Bu yolla ölkələrimiz arasında ənənəvi münasibətlərimizin daha da möhkəmlənməsinə, sarsılmaz xarakter almasına nail oluruq. Bu, çox genişmiqyaslı, çoxşaxəli münasibət deməkdir.
Biz bu layihə ilə həm də Türkiyəyə və digər yerlərə, məkanlara,
ölkələrə də çıxış əldə edəcəyik. Bu, bizim böyük nailiyyətimizdir. Biz istəmirik ki, heç bir ölkə bu transformasiya prosesindən kənarda qalsın. Hesab edirik ki, istənilən ölkə bərabərlik prinsipi əsasında iradələrinə arxalanaraq, irəliyə addımlar atmalıdır və hamı bu əməkdaşlığa başlamalıdır. Ona görə qonşu Ermənistanla da dostluq münasibətlərimizi inkişaf etdirməliyik. Çünki onların da alternativ enerji mənbələrinə ehtiyacları vardır. Bu əməkdaşlıq vacibdir və ümumi addımlar atmaq lazımdır.
Bir daha demək istəyirəm ki, biz keçmişdə çətin anlar yaşamışıq. Hazırda böyük bir cəsarətli addım atmışıq. Belə bir sazişin imzalanması ilə ölkələrimizin parlaq gələcəyini təmin edirik. Bu layihə ilə bağlı mən hər üç ölkəni təbrik edirəm. İndi biz bu sənədləri imzalayacağıq. Bir sözlə, böyük nəqliyyat-tikinti layihəsinə başlayacağıq.
Biz paytaxtımızda 6 ay bundan əvvəl hava limanının da tikintisinə başlamışdıq və artıq bu böyük layihəni başa çatdırırıq. Beləliklə, dostluğumuzu, aramızda olan yaxınlığı möhkəmləndirəcəyik və qarşılıqlı əməkdaşlığı bu cür yollarla davam etdirəcəyik.
Mən Azərbaycan Prezidentinə və Türkiyənin Baş nazirinə təşəkkür edir, bu cür vacib əməkdaşlığa görə onlara dərin minnətdarlığımı bildirirəm.
Bölmənin digər xəbərləri
