GÜRCÜSTAN PREZİDENTİ MİXAİL SAAKAŞVİLİNİN ÇIXIŞI
- Mən ilk öncə, cənab İlham Əliyevə minnətdarlığımı bildirmək istəyirəm. O, bizim dostumuz, qardaşımızdır və ölkəmizə gəlib, Tbilisi şəhərində bu yeni hava limanının açılışında çox xoş, səmimi sözlər dedi. Bu, bizim Gürcüstanın yeni bir simasıdır və İlham Əliyev hər zaman bizə yaxın olubdur. Bu gün o, bizim bir nömrəli sərnişinimiz olaraq, yeni hava limanından öz Vətəninə yola düşəcəkdir. Biz bu gün bir çox siyasi bəyanatlar verdik. Lakin mən şəxsi həyatımdan bir əhvalatı söyləmək istəyirəm. Mən gənc olanda təhsil almaq üçün Gürcüstandan Ukraynaya getdim. Orada özümü çox yaxşı hiss edirdim. Bu, 1980-ci illərin axırı, 1990-cı illərin əvvəlləri idi. Mənim yadımdadır, haraya gedirdimsə, yerindən, milli mənsubiyyətindən asılı olmayaraq, yaxşı qarşılayırdılar. O vaxtlar Tbilisiyə gəlib-gedəndə nənəm, babam məni hava limanında qarşılayırdılar, yola salırdılar. Gənclik vaxtlarında hava limanında qarşılanmaq, bu qapılardan keçmək maraqlı və yaxşı hisslər idi. O vaxtlar biz Tbilisidən bir çox istiqamətlərə gedirdik və əcnəbilərin sayı da çox az idi. Onlar bəzən bizə deyirdilər, əminsinizmi ki, nə vaxtsa təyyarəniz özünüzün hava limanına enəcəkdir. Hətta iki il bundan əvvəl belə bir hava limanının olacağına əcnəbilər şübhə edirdilər. Bizim keçmişimiz çox çətin, məşəqqətli faktlarla dolu idi. Lakin indi biz çox gözəl, işıqlı yeni binada bir yerə yığışmışıq.
Mənim yadımdadır ki, həyat yoldaşımla Tbilisiyə gələndə, təyyarənin enməsi prosesi çox çətin idi. Siz də bilirsiniz, mənim dostlarım da bilirlər ki, vaxtilə biz ölkəmizin daxilində də hava uçuşlarını yerinə yetirirdik. Biz hər zaman görürdük ki, onlar yüksək səviyyədə deyil və standartlara cavab vermirdi. İnsanların, vətəndaşların bu xidmətlərdən qəm-qüssə, kədərlə istifadə etdiyini görürdük. İndi isə mən burada böyük dəyişikliyin şahidi oluram.
Mən belə bir söhbəti də eşitmişəm. Bir gün Parisə səfər etmişdim və mənə dedilər ki, siz belə bir gözəl yerə gəlmisiniz. Siz haradan gəlmisiniz, sizin ölkəniz haqqında məlumatımız yoxdur. Mən çox təəccüblənərək, onlara öz ölkəm haqqında danışdım. Amma gördüm ki, hələ bizim ölkəmiz lazımınca təqdim olunmayıbdır. Sonralar mənim əcnəbi dostlarım Tbilisiyə gəlib görəndə təəccübləndilər ki, bura həqiqətənmi Tbilisidir, nə qədər dəyişikliklər baş veribdir. İndi siz görürsünüz ki, bu gün biz yeni bir hava limanına yığışmışıq və burada yeni nailiyyətimizi qeyd edirik. Ona görə mən onlara demişdim, siz elə hesab etməyin ki, biz irəliyə doğru getməyəcəyik. Biz irəliyə doğru gedəcəyik, hətta bunu çox qısa müddət ərzində edəcəyik. Bəzi insanlar bunlara o qədər də etimadla yanaşmırdılar. Lakin indi onlar buna inamla yanaşırlar.
Bizim ölkəmizdə baş verən proseslər, yaranan ənənələr olduqca vacibdir. Biz buradan Münxen, Brüssel, Köln, Paris istiqamətlərinə uçuşları yerinə yetirəcəyik. Sizə deyərdim ki, bu hava limanı Münxen hava limanından daha yaxşıdır. Biz bununla kifayətlənməli deyilik və Tbilisinin beynəlxalq hava limanından yüksək standartlara uyğun istifadə etməliyik. Ona görə hesab edirəm ki, görülən işlər ən yüksək səviyyəyə cavab verir və həyatımızı yaxşılaşdırır.
Bu gün biz dostum İlhamla Mərkəzi universitet klinikası ilə tanış olduq. Orada yeniləşmə işləri aparılır. Lakin biz bununla kifayətlənməyəcəyik, daha yeni, müasir işlərin görülməsinə nail olacağıq. Bu işləri görməklə bərabər, insanlar elə hesab etməsinlər ki, ölkə iki il ərzində tam yeniləşə bilər. Bu iki il ərzində əldə etdiyimiz nailiyyətlər gələcəkdə də davam etdiriləcək və bu, Gürcüstanın hər bir əyalətinə də şamil olunacaqdır. Elə bir gün gələcək ki, Gürcüstanın hər bir yeri elektrik enerjisi ilə təmin olunacaqdır. Bizim xəstəxana tikintisi ilə bağlı yeni layihələrimiz var və onlar həyata keçiriləcək, mühüm rayonlarda xəstəxanalar tikiləcəkdir. Daha sonra məktəblər də tikiləcəkdir. Bizim bununla bağlı bir layihəmiz var və o, gələn il başa çatdırılacaqdır.
Gürcüstan son üç il ərzində doğumun sayına görə öndə gedən bir ölkəyə çevrilibdir. Bu da müsbət bir haldır. Mən özüm də şəxsən bu işə töhfə verdim. Ona görə, sizdən xahiş edirəm ki, hamı məndən nümunə götürsün, əhalinin artımına öz töhfəsini versin.
Mən demək istəyirəm ki, bizim gürcüstanlı həmvətənlərimiz, hansı ki, bu gün xaricdə yaşayırlar, onların bir çoxu bu gün dünyaya açılan yeni bir Gürcüstanda yaşamaq məqsədi ilə qayıdırlar. Artıq 60-70 min həmyerlimiz ölkəmizə qayıtmışdır. Siz sadəcə, Gürcüstana gəlməlisiniz. Bizim bütün sektorlarda mütəxəssislərə ehtiyacımız var.
Mən xüsusi olaraq TAV şirkətinin rəhbərliyinə, işçilərinə öz minnətdarlığımı bildirmək istəyirəm ki, onlar, sözün əsl mənasında, çox valehedici, təsiredici bir iş görmüşlər. Onların fəaliyyəti üçün burada yaxşı şərait yaradılmışdır. Bizim yeni mütəxəssislərə ehtiyacımız var. Bu gün ölkəmizdə o qədər də təcrübəli inşaatçı, kifayət qədər mütəxəssis yoxdur. Hazırda ölkəmizə yüksək texnologiyalar gətirilir, avadanlıq quraşdırılır. Ölkəmizi tərk etmiş mütəxəssislər digər ölkələrdə çalışırlar. Mən onlara demək istəyirəm ki, Gürcüstana qayıdış prosesi çox böyük uğurlar gətirmişdir və siz də bu işlərə yüksək ruhla qoşulmalısınız, bu proseslərdə iştirak etməlisiniz.
Sonda demək istəyirəm ki, Tbilisi hava limanı hamınızın üzünə açıq olacaq və sizi daim qarşılayacaqdır. Biz bu gün Gürcüstanın, ölkəmizin gələcəyindən fəxrlə danışa bilərik və yeni hava limanının açılışını fərəh hissi ilə qeyd edirik. Çox sağ olun.
X X X
Beynəlxalq hava limanının açılışını bildirən lenti kəsən prezidentlər və Baş nazir müasir üslubda tikilmiş, hər bir şərait yaradılmış, Avropa standartlarına uyğun aerovağzal binası ilə tanış oldular.
Burada incəsənət ustalarının iştirakı ilə konsert verildi.
Bölmənin digər xəbərləri
