Gürcüstan Türkiyə ilə Ukraynaya müntəzəm aviareysləri bərpa edir
Tbilisi, 28 yanvar, AZƏRTAC
Gürcüstan fevralın 4-dən Türkiyə ilə Ukraynaya müntəzəm aviareysləri bərpa edəcək.
AZƏRTAC xəbər verir ki, bu barədə Ş.Rustaveli adına Tbilisi beynəlxalq hava limanın məlumat yayıb.
Bildirilir ki, fevralın 4-dən Gürcüstan ilə Türkiyə arasında Tbilisi-İstanbul-Tbilisi istiqaməti üzrə müntəzəm aviareyslərin həyata keçirilməsinə başlanılacaq. Reysləri “Pegasus Airlines” aviaşirkəti həftədə 5 dəfə yerinə yetirəcək. Mart ayından isə uçuşların gündəlik həyata keçirilməsi planlaşdırılır.
Gürcüstan ilə Ukrayna arasında aviauçuşları Ukraynanın “SkyUp Airlines” şirkəti də həftədə iki dəfə Kiyev-Tbilisi-Kiyev istiqaməti üzrə həyata keçirəcək.
Qeyd edək ki, Gürcüstan fevralın 1-dən beynəlxalq aviauçuşların həyata keçirilməsinə icazə verib. Amma hələlik bu icazə, ilk növbədə, Avropa İttifaqına üzv dövlətlərin, İsrail və Körfəz ölkələrinin vətəndaşlarına tətbiq olunacaq.
Məlumat üçün bildirək ki, Gürcüstan 2020-ci ilin mart ayından bütün beynəlxalq aviareyslərə qadağa qoyub. Hazırda Gürcüstandan yalnız Berlin, Münhen, Paris, Riqa, Amsterdam, Afina, Varşava, Vilnüs, Dortmund, Doha və Milan şəhərlərinə aviareyslər həyata keçirilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
