Gürcüstanda bu gündən bütün istiqamətlərdə müntəzəm aviareyslər bərpa olunub
Tbilisi, 1 fevral, AZƏRTAC
Gürcüstanda fevralın 1-dən bütün istiqamətlərdə müntəzəm aviareyslər bərpa edilib.
AZƏRTAC xəbər verir ki, bu barədə Gürcüstanın iqtisadiyyat və davamlı inkişaf naziri Natia Turnava hökumətin Dövlət İdarələrarası Koordinasiya Şurasının bugünkü iclasından sonra keçirdiyi brifinqdə deyib.
Onun sözlərinə görə, şura bu gündən bütün müntəzəm uçuşların bərpası barədə qərar qəbul edib. Qərara əsasən, uçuşlar bütün tibbi protokol qaydalarına riayət olunmaqla həyata keçiriləcək.
Nazir deyib ki, Gürcüstanda fəaliyyət göstərən və fəaliyyətini davam etdirən, həmçinin aviasiya bazarına daxil olmaq arzusunda olan bütün aviaşirkətlər müntəzəm uçuşlar təyin edə biləcək.
Qeyd edək ki, bundan əvvəl Gürcüstan hökuməti müntəzəm aviauçuşların bərpasını Avropa İttifaqına üzv dövlətlərin, İsrail və Körfəz ölkələrinin şirkətləri üçün nəzərdə tutmuşdu. Yeni qərarla bütün istiqamətlər üzrə aviareyslərə icazə verilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
