Gürcüstanda dolu azərbaycanlılar yaşayan bölgələrə ciddi ziyan vurub
Tbilisi, 22 avqust, AZƏRTAC
Avqustun 21-də axşam saatlarında Gürcüstanın bölgələrinə düşən dolu ciddi problemlər yaradıb.
AZƏRTAC xəbər verir ki, təbii fəlakət nəticəsində azərbaycanlıların yığcam yaşadıqları Saqareco və Dmanisi rayonlarına da ciddi ziyan dəyib.
Dolu Dmanisi rayonunda rayon mərkəzinə və 12 kənddə, Saqarecoda isə rayon mərkəzi də daxil olmaqla 5 kənddə fermerlərə ciddi zərər vurub, meyvə bağlarını və əkin sahələrini yararsız hala salıb.
Dolu nəticəsində Saqareco rayon mərkəzi və kəndlərə elektrik enerjisini verilməsində problem yaranıb.
İlkin hesablamalara görə, hər iki rayona dəymiş ziyanın həcmi milyon laridən çoxdur.
Qeyd edək ki, sinoptiklər Gürcüstanda qeyri-sabit hava şəraitinin avqustun 25-dək davam edəcəyini proqnozlaşdırırlar.
Bəzi dağətəyi bölgələrdə torpaq sürüşməsi, qara dəniz sahillərində isə qasırğa barədə əhaliyə xəbərdarlıq olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
