GÜRCÜSTANIN TƏHSİL VƏ ELM NAZİRİ BALAKƏNDƏ OLMUŞDUR

24.05.2006 [15:35]
Çap et
A⁺ A^-

AZƏRTAC-ın müxbiri xəbər verir ki, Gürcüstanın təhsil və elm naziri Aleksandr Lomayanın başçılıq etdiyi nümayəndə heyəti mayın 23-də Balakən rayonunun ingiloyların yaşadığı İtitala kəndində olmuşdur. Gürcüstanlı qonaqlar burada kənd orta məktəbinin müəllim və şagird kollektivi ilə görüşmüş, məktəbin gürcüdilli bölməsində təhsil alan şagirdlər üçün gətirdikləri humanitar yardımı - məktəb ləvazimatını və dərslikləri pedaqoji kollektivə təhvil vermişlər.

Görüşdə respublikamızın təhsil nazirinin müavini İsgəndər İsgəndərov və Balakən Rayon İcra Hakimiyyətinin başçısı Asif Məmmədov çıxış edərək ölkələrimiz arasında gündən-günə genişlənməkdə olan ikitərəfli əlaqələrin mühüm əhəmiyyətinə toxunmuş, Prezident İlham Əliyev tərəfindən həyata keçirilən milli siyasət strategiyasının düzgünlüyünü, Azərbaycanda yaşayan azsaylı xalqların dilinin, adət və ənənələrinin qorunub saxlanması üçün lazımi şərait yaradıldığını xüsusi qeyd etmiş, hədiyyələrə görə dost ölkənin nümayəndələrinə minnətdarlıqlarını bildirmişlər.

Görüşdə Gürcüstanın Azərbaycandakı səfiri Zurab Qumberidze iştirak etmişdir.