Havanın dəyişkən keçməsi ilə əlaqədar olaraq təbii qazın qəbulunda fərqlilik yaranıb
Bakı, 19 may, AZƏRTAC
Havanın dəyişkən keçməsi ilə əlaqədar olaraq təbii qazın qəbulunda fərqlilik yaranıb. SOCAR-ın “Azəriqaz” İstehsalat Birliyi (İB) üzrə mayın 18-də respublika ərazisində ümumi sutkalıq təbii qazın qəbulu 13 milyon 431 min kubmetr təşkil edib.
AZƏRTAC xəbər verir ki, bu sözləri “Azəriqaz” İB-nin Rejimlərə nəzarət və mərkəzi dispetçer şöbəsinin rəisi Rasim Əhmədov “Açıq qapı” aksiyası çərçivəsində media nümayəndələri ilə keçirilən görüş zamanı bildirib.
Şöbə rəisinin sözlərinə görə, Bakı şəhəri və Abşeron yarımadası üzrə qaz qəbulu 9 milyon 249 min kubmetr, regionlar üzrə isə 4 milyon 182 min kubmetr təşkil edib. “Sutka ərzində ümumi qəbulun 69 faizi Bakı şəhəri və Abşeron yarımadasının, 31 faizi isə regionların payına düşür”, - deyə Rasim Əhmədov qeyd edib.
Birliyin Qəza Çağrı Xidməti şöbəsinin rəisi Xalidə Şimşək cari ilin ötən dövründə Çağrı Mərkəzinə daxil olan müraciətlər barədə media nümayəndələrinə məlumat verib: “Bu dövrdə SOCAR “Azəriqaz” İB-nin Çağrı Mərkəzinə daxil olan müraciətlərin sayında ötən ilin müvafiq dövrü ilə müqayisədə 27 min 946 müraciət azalma var”. Şöbə rəisinin sözlərinə görə, cari ildə qaz təzyiqi və qaz təchizatı ilə bağlı 10 min 638, qaz sızmaları ilə bağlı 324, sayğaclarla bağlı isə 6 min 620 müraciət az daxil olub. “Məlumat xarakterli müraciətlərin sayına gəldikdə isə, bu istiqamətdə 10 min 364 müraciət az daxil olub. Bütün bunlar “Azəriqaz” İB tərəfindən həyata keçirilən maarifləndirmə, yenidənqurma işlərinin nəticəsidir”, - deyə qurum rəsmisi bildirib.
Bölmənin digər xəbərləri
