Azərbaycan idmançıları 2004-cü ilin Olimpiya oyunlarına bu günədək 12 lisenziya qazanmışlar. Komandamızın lisenziya ehtiyatına ən böyük töhfəni ağır atletlər vermişlər. Onlar sonuncu dünya çempionatından beş lisenziya ilə qayıtmışlar. Sərbəst güləşənlərimizin gələn ilin başlıca oyunlarına iki lisenziyası var. Yunan-Roma üsulu ilə güləşənlər də bir o qədər vəsiqə əldə etmişlər. İradə Haşımova (güllə atıcılığı) və Zemfira Meftahəddinova (stend atıcılığı) da Afina Olimpiadasına getmək hüququ qazanmışlar. Müstəqil Azərbaycanın tarixində ilk dəfə olaraq, ölkəmiz Olimpiadada bədii gimnastika yarışlarında təmsil ediləcəkdir.

Beləliklə, noyabrın sonunadək idmanın altı növündə 12 olimpiya lisenziyası qazanılmışdır.

Xatırladaq ki, Azərbaycan idmançıları Atlanta Olimpiadasında beş növdə yarışmışdılarsa, Sidneydə 31 lisenziya ilə 9 növdə mübarizə aparmışlar.

Gələn il ölkəmizdə cüdo, boks və voleybol üzrə üç lisenziya turniri keçiriləcəkdir. Boks, cüdo, taekvondo, güləş, voleybol federasiyalarının rəhbərləri bu və digər lisenziya turnirlərində komandamızın Afina Olimpiadasına vəsiqələrinin sayını artırmaq ümidindədirlər.

Gənclər, İdman və Turizm Nazirliyindən AZƏRTAC-ın müxbirinə bildirmişlər ki, ötən Olimpiadada olduğu kimi, bu dəfə də Azərbaycanın üzgüçülük və yüngül atletika növlərinin hərəsində iki lisenziya qazanmaq imkanı var.