Heydər Əliyev adına Bakı neft emalı zavodunda ekoloji monitorinq aparılmışdır
Bakı, 12 iyul (AZƏRTAC). Azərbaycan Respublikası Dövlət Neft Şirkətinin (ARDNŞ) ekologiya idarəsi tərəfindən Heydər Əliyev adına Bakı neft emalı zavodunda (BNEZ) ekoloji monitorinq aparılmışdır.
AZƏRTAC xəbər verir ki, mütəxəssislər tərəfindən müəssisədə ətraf mühitin mühafizəsi sahəsində mövcud qanunvericiliyin və normativ sənədlərin tələblərinə əsasən neft-qaz hasilatının və emalının təmizləyici sisteminin, qurğu və avadanlıqlarının vəziyyəti, su hövzələrinin qorunması, tullantı sularının idarə olunması, eyni zamanda, yaşıllaşdırma işinin aparılması və başqa istiqamətdə nəzarət həyata keçirilmişdir.
Aparılan monitorinqlər nəticəsində məlum olmuşdur ki, BNEZ-in texnoloji qurğularında, əmtəə parklarında yaranan sənaye çirkab suları və yağış suları kanalizasiya kollektorları ilə mexaniki təmizləyici qurğulara daxil olur. Burada həmin sular qumdan, gildən, mexaniki qarışıqlardan və neftdən təmizləndikdən sonra Zığ sahəsində yerləşən bioloji təmizləyici qurğuya ötürülür.
Zavodun texnoloji sahələrində tətbiq edilmiş yeni texnika və texnologiyalar çirkab suların həm miqdarının azalmasına, həm də çirklənmə dərəcəsinin minimuma endirilməsinə imkan yaratmışdır.
Bölmənin digər xəbərləri
