HEYDƏR ƏLİYEV VƏ AZƏRBAYCAN TARİXİ DƏRSLİKLƏRİ
Sumqayıt təhsil şöbəsi Azərbaycan Müəllimlər İnstitutunun şəhər filialı ilə birlikdə “Heydər Əliyev və Azərbaycan tarixinə dair dərsliklər” mövzusunda “dəyirmi masa” təşkil etmişdir.
Təhsil şöbəsinin müdiri Vidadi Bağırov “dəyirmi masa”nı açaraq, vətəndaşın və şəxsiyyətin formalaşmasında və kamilləşməsində Azərbaycan tarixinə dair dərsliklərin rolundan danışmışdır. O demişdir ki, yaxşı dərslik, bir qayda olaraq, alim və müəllimlərin əməkdaşlığı sayəsində yaranır.
Sonra VI, VIII, X və XI siniflər üçün “Azərbaycan tarixi” və “Qədim dünya tarixi” dərsliklərinin müəllifləri- tarix elmləri doktorları, professorlar Tofiq Vəliyev, Vəli Əliyev, Vaqif Piriyev, tarix elmləri namizədi Mansur Mansurov, habelə Bakıdakı 31 nömrəli məktəbin tarix müəllimi Aida Məmmədova, Müasir Təhsil Kompleksinin kafedra müdiri Əkbər Qocayev yeni nəşr olunmuş dərslikləri Sumqayıt məktəblərinin tarix müəllimləri ilə birlikdə müzakirə etmişlər. Bildirilmişdir ki, Təhsil Nazirliyi Azərbaycan Prezidenti Heydər Əliyevin göstərişlərini yerinə yetirərək, yeni dərsliklərin hazırlanması və nəşri ilə bağlı bütün məsələlərlə məşğul olan redaksiya heyəti yaratmışdır.
Sumqayıt müəllimləri öz irad və təkliflərini söyləmişlər. Müəlliflər məktəblilərin də rəylərini öyrənmişlər. Belə bir inam ifadə olunmuşdur ki, məktəblilərimiz öz ölkəsinin tarixini yeni dərsliklərdən öyrəndikcə, milli qürur hissi keçirəcəklər.
Bölmənin digər xəbərləri
