Hindistanda yol-nəqliyyat hadisəsi nəticəsində 9 nəfər ölüb, 13 nəfər xəsarət alıb
Pekin, 1 fevral, AZƏRTAC
Hindistanın Odişa ştatında sərnişin daşıyan pikap tipli avtomobilin yol kənarındakı ağaca çırpılaraq aşması nəticəsində azı 9 nəfər həlak olub, 13 nəfər xəsarət alıb.
AZƏRTAC yerli KİV-lərə istinadla xəbər verir ki, hadisə Korapur rayonunda baş verib. Polisin məlumatına əsasən, ölənlərin hamısı qadındır. Onlar qonşu Çattisqarh ştatından qohumlarının dəfn mərasiminə gəldikləri bildirilir. Yaralılar yaxınlıqda yaşayan sakinlərin köməyi ilə xəstəxanalara çatdırılıblar.
İlkin ehtimala əsasən, avtomobilin həmin yol üçün müəyyənləşdirilmiş sürət həddini keçməsi və nəticədə sürücünün idarəetməni itirməsi qəzaya səbəb olub.
Qeyd edək ki, Hindistanın Yol Nəqliyyatı və Magistral Yollar Nazirliyinin statistikasına əsasən, ölkədə yol-nəqliyyat hadisələri nəticəsində hər gün orta hesabla 415 nəfər ölür. Qəzalar daha çox avtomobillərə normadan artıq sərnişin minməsindən, yolların pis vəziyyətindən və sürücülərin nəqliyyat vasitələrini təhlükəli idarə etməsindən qaynaqlanır.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
