İCTİMAİ SƏRMAYƏ PROQRAMI BAŞA ÇATMIŞDIR
Azərbaycan Beynəlxalq Əməliyyat Şirkətindən (ABƏŞ) AZƏRTAC-a bildirmişlər ki, “Azəri-Çıraq-Günəşli” (AÇG) layihəsinin Bibiheybət ərazisinə dair ictimai sərmayə proqramı (İSP) uğurla başa çatdırılmışdır. Dəyəri 400 min ABŞ dolları olan proqramdan məqsəd icma qurumlarını möhkəmləndirmək, liderlik qabiliyyəti aşılamaq və texniki bacarığı inkişaf etdirmək olmuşdur. Proqram Bibiheybətdə və burada məcburi köçkünlərin məskunlaşdıqları yaşayış məntəqəsində elektrik təchizatı sisteminin bərpasını, tibb məntəqəsinin inşasını, avadanlıqla təchiz olunmasını, məktəb idman salonunun, ilk tibbi yardım məntəqəsinin, bir icma mərkəzinin və uşaq bağçasının tikilməsini, park salınmasını və başqa mikrolayihələri əhatə etmişdir.
Bu proqramdan təqribən 1850 nəfər bilavasitə faydalanmışdır.
