CƏMİYYƏT
“İƏT Modeli – 2023” proqramı öz işinə başladı
Bakı, 3 aprel, AZƏRTAC
Artıq 10 ildən çoxdur Azərbaycanda hər il uğurla həyata keçirilən “İslam Əməkdaşlıq Təşkilatı (İƏT) Modeli - Beynəlxalq Münasibətlər Akademiyası” layihəsinə növbəti dəfə start verilib.
Təşkilatın Baş katibliyindən AZƏRTAC-a bildiriblər ki, İslam Əməkdaşlıq Gənclər Forumunun Bakıda yerləşən Avrasiya Regional Mərkəzi və Azərbaycan Respublikası Gənclər və İdman Nazirliyinin birgə tərəfdaşlığı ilə həyata keçirilən layihənin 2023-cü il buraxılışı ilk mühazirə proqramı ilə öz işinə başlayıb. Proqramda iştirak üçün müsahibə əsasında Azərbaycanın bir sıra aparıcı ali məktəblərini təmsil edən və iştirak üçün müraciət etmiş yüzlərlə tələbə arasından xüsusi istedadı və xarici dil bacarıqları ilə fərqlənən 100-dən çox gənc seçilib. Builki sessiyalarda 10-dan çox əcnəbi tələbə iştirak etmək hüququ əldə edib. İştirakçıların iki ay ərzində hər həftə baş tutacaq mühazirələrdə və sonda təşkil olunacaq “İƏT Modeli XİN konfransı” simulyasiyasında iştirakı nəzərdə tutulub.
Akademiyanın builki buraxılışının Azərbaycan Dövlət İqtisad Universitetində (ADİU) keçirilmiş açılış mərasimində layihənin koordinatoru Möminə Mehdi “İƏT Modeli” proqramının məqsəd və vəzifələri haqqında, eləcə də bununla bağlı keçən illər ərzində əldə edilmiş təcrübəni özündə əks etdirən təqdimatla çıxış edib. Daha sonra İslam Əməkdaşlıq Gənclər Forumunun Avrasiya Regional Mərkəzinin (İƏGF-ARM) əməkdaşı Aydan Bağırlı layihənin tərəfdaşı kimi Azərbaycan Respublikası Gənclər və İdman Nazirliyinə, eləcə də tədbirlərə təşkilati dəstək göstərən ADİU rəhbərliyinə Mərkəz adından təşəkkürünü bildirib, o cümlədən İƏGF-ARM-in fəaliyyəti, son illər Qarabağ həqiqətlərinin dünya ictimaiyyətinə çatdırılması sahəsində görülən işlər haqqında məlumat verib. ADİU-nun Beynəlxalq əməkdaşlıq departamentinin direktoru Nərmin İbrahimova öz çıxışında təmsil etdiyi ali məktəblə İƏGF Avrasiya Regional Mərkəzi arasında əməkdaşlığa yüksək qiymət verib. İslam Əməkdaşlıq Gənclər Forumunun Baş Qərargahının nümayəndəsi Yunus Çolak İstanbuldan onlayn formatda Beynəlxalq İƏT Modeli haqqında iştirakçıları məlumatlandırıb. Qambiyalı tələbə Musa Sisey Mərkəzin konfranslarında əldə etdiyi təcrübə barədə öz fikirlərini iştirakçılarla bölüşüb.
Daha sonra Fələstin dövlətinin Azərbaycandakı fövqəladə və səlahiyyətli səfiri Nəssir Əbdül Kərim Əbdül Rəhim “Müsəlman dünyası və Fələstin məsələsi”, ADA Universitetinin prorektoru Fariz İsmayılzadə isə “Müasir zamanda ictimai diplomatiya” mövzusunda çıxış ediblər. Mühazirəçilər tələbələrin müxtəlif suallarını cavablandırıblar.
Xatırladaq ki, İƏT Modeli proqramının əsas məqsədləri İƏT məkanında gənclərin beynəlxalq əməkdaşlığının güclənməsinə dəstək vermək, gənclərin və gənclər təşkilatları rəhbərlərinin və üzvlərinin diplomatiya, idarəetmə, kommunikasiya sahəsində yeni bilik və təcrübə əldə etməsinə yardım etməkdir. İki ay ərzində keçirilən mühazirələrdən sonra tələbələr “İƏT Modeli XİN konfransı” adlanan simulyasiya oyunlarında iştirak edir və münsiflər heyətinin qərarı ilə xarici dil qabiliyyəti və xüsusi yaradıcılıq bacarığı ilə seçilən tələbələr “Beynəlxalq İƏT Modeli” yarışmasında Azərbaycanı təmsil etmək hüququ qazanırlar.
Ötən illər ərzində azərbaycanlı tələbələr dəfələrlə ümum-İƏT miqyasını əhatə edən və 40-dan artıq İƏT-ə üzv ölkə nümayəndələrinin iştirak etdiyi “Beynəlxalq İƏT Modeli” yarışmalarında ölkəmizi layiqli şəkildə təmsil ediblər.