İLİN YEDDİ AYI “AZƏRDƏMİRYOLBANK” SƏHMDAR BANKI ÜÇÜN UĞURLU OLMUŞDUR

21.08.2004 [21:03]
Çap et
A⁺ A^-

“Azərdəmiryolbank” Səhmdar Bankının mətbuat xidmətindən AZƏRTAC-a bildirmişlər ki, ilin əvvəlinə nisbətən bankın kredit portfeli 14,6 milyard manata və ya 26,1 faiz artaraq 70,4 milyard manat təşkil etmişdir. Verilmiş kreditlərin 58,9 faizi (41,5 milyard manat) qısamüddətli, 41,1 faizi isə (28,9 milyard manat) uzunmüddətli kreditlər olmuşdur.

Cari il avqustun 1-dək ümumi cəlb edilmiş vəsaitlər 83,2 milyard manat təşkil etmişdir. Bu vəsaitin 18,6 milyard manatı maliyyə sektorundan cəlb edilmiş, 19,0 milyard manatını korporativ müştərilərin, 45,6 milyard manatını isə fiziki şəxslərin vəsaitləri təşkil etmişdir. Fiziki şəxslərin əmanətlərinin yalnız iyul ayı ərzində 2,0 milyard manat, ötən yeddi ayda isə ümumilikdə 34,8 faiz artımı əhalinin banka olan yüksək inamının göstəricisidir.

İlin əvvəlindən bəri bankın ümumi gəlirləri 15822,2 milyon manat, ümumi xərcləri 12241,5 milyon manat olmaqla, mənfəət 3580,7 milyon manat təşkil etmişdir ki, bu da ötən ilin müvafiq dövrünə nisbətən 59,5 faiz çoxdur. Ötən yeddi ayda qazanılmış mənfəətdən 965,3 milyon manat vergi ödənilmişdir.

Bu il avqustun 1-nə Bankın kapitalı artaraq 29,1 milyard manata çatmışdır.

İlin əvvəlindən bankın müştərilərinin ümumi sayı artaraq 28522 olmuşdur. Müştərilərin 218-i hüquqi və 6278-i fiziki şəxslərdən ibarət olmuşdur.