İngiltərədə xəstəxanalar görünməmiş dərəcədə ağır qrip mövsümü ilə üz-üzədir
London, 5 dekabr, AZƏRTAC
İngiltərədə bu il qış mövsümü başlayandan xəstəxanalara qəbullar rekord həddə çatıb.
AZƏRTAC BBC-yə istinadla xəbər verir ki, səhiyyə xidməti xəstəxanalarda qrip diaqnozu ilə müalicə olunan xəstələrin sayının kəskin artdığını deyib. Rəsmi statistikalara əsasən, ötən həftə İngiltərədə xəstəxanalarda gündə orta hesabla 1700 qrip xəstəsi qeydə alınıb. Bu göstərici ötən ilin eyni dövrü ilə müqayisədə 50 faizdən çox artım deməkdir. İlkin məlumatlar isə göstərir ki, bu həftə hospitalizasiyanın sayı daha da sürətlə yüksəlməkdədir.
Mütəxəssislər bildirirlər ki, bu il qrip mövsümü adi vaxtdan bir ay tez başlayıb və dövriyyədə daha ağır gedişatlı bir ştammın olması ehtimal edilir. İngiltərənin baş həkimi, professor Kris Vitti xəbərdarlıq edərək bildirib ki, xüsusilə yaşlı insanlar arasında pnevmoniya və qrip kimi xəstəliklərə daha ciddi yanaşmaq, vaxtında müdaxilə etmək həyati əhəmiyyət daşıyır.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
