İnternet insan yaddaşına təsir edir
Bakı, 18 iyul (AZƏRTAC). Hazırda həyatını kompyutersiz və internetsiz təsəvvür edən adam çətin ki, tapılsın. Müasir texnologiyalar insanı həm işdə, həm də istirahətdə müşayiət edən ayrılmaz yol yoldaşına çevrilmişdir. “Google” effekti” mövzusunda araşdırmalar aparan Kolumbiya Universiteti alimləri belə qənaətə gəlmişlər ki, müxtəlif “qacetlərə” tez-tez müraciət etmək artıq beynimizin işinə, daha dəqiq desək, informasiyanı yadda saxlamaq prosesinə təsir göstərməyə başlayır.
Elmi proqramın rəhbəri, psixoloq Betsi Sperrou demişdir: “Çoxsaylı eksperimentlərin nəticələri göstərmişdir ki, bu və ya digər məlumatı təkrar harada tapacağını bilən insanın həmin məlumatı yadda saxlaması çətin olur. Lakin bu heç də o demək deyildir ki, “Google” və ya digər axtarış sistemləri müasir cəmiyyəti kütləşdirir. Əksinə, biz bir çox şeyləri, hətta internetdə çətin tapılan sözləri hələ də yadda saxlaya bilirik. Müasir insan xatirələrindən məhrum olan şüursuz məxluq deyildir. Lakin zaman keçdikcə biz informasiya almaq yolunu informasiyanın özündən yaxşı yadda saxlayırıq. İnsanlar daha sırf öz yaddaşlarına güvənməyib, kompyuterə və internetə bərabər alternativ kimi baxırlar”.
ABŞ alimlərinin təhqiqatları göstərmişdir ki, testlərdə iştirak edənlər mürəkkəb suala cavab vermək üçün dərhal kompyuterə müraciət etmiş, alternativ mənbə kimi öz yaddaşlarından istifadə etməyə heç cəhd də göstərməmişlər.
Alimlərin fikrincə, bu yolla kompyuter və internet getdikcə insanın özünəməxsus “xarici yaddaş qurğusuna” çevrilməkdə, yaddaşımız isə müasir texnologiyalara uyğunlaşmaqdadır.
Bölmənin digər xəbərləri
