İRANDA “ORİFLEYM” ŞİRKƏTİNİN OFİSİ BAĞLANMIŞ VƏ DÖRD ƏMƏKDAŞI HƏBS OLUNMUŞDUR
Bakı, 23 avqust (AZƏRTAC). İran hakimiyyəti Tehranda İsveçin “Orifleym” kosmetika şirkətinin dörd əməkdaşını həbs etmiş, firmanın bu ölkədəki ofisini bağlamışdır. Həbs olunanlar arasında İsveç konserninin yerli bölməsinin rəhbəri də vardır.
“Orifleym” şirkəti ofisin bağlanmasına və əməkdaşlarının həbs olunmasına dair hər hansı bir izahat almamışdır. Şirkət ehtimal edir ki, bu, konsernin konsepsiyası ilə - kosmetik məhsulların mağaza vasitəsilə deyil, əldən-ələ yayılması ilə əlaqədardır. Bu yolla 40 min iranlıya, əsasən də qadınlara iş imkanı verdiklərini deyən şirkətin maliyyə direktoru Qabriel Bennet son hadisələrə baxmayaraq İrandakı təmsilçiliyi bağlamağa hazırlaşmadıqlarını bildirmişdir. Onun sözlərinə görə, hadisələri dəyərləndirmək üçün daha çox informasiyaya ehtiyacları vardır.
İrandakı satışlardan əldə olunan gəlir şirkətin Asiyadakı dövriyyəsinin 20 faizini təşkil edir. Buna görə İrandakı təmsilçiliyin bağlanması şirkətin 10 milyon avro itirməsinə səbəb ola bilər.
Bölmənin digər xəbərləri
