İranın Əfqanıstan ilə sərhədində silahlı toqquşma baş verib

22.04.2020 [14:20]
Çap et
A⁺ A^-

Tehran, 22 aprel, AZƏRTAC

İranın Cənub-Şərqindəki Sistan-Bəlicistan vilayətində İran İslam İnqilabının Keşikçiləri Korpusu (Sepah) əsgərləri və narkotik vasitələrinin qaçaqmalçılığı ilə məşğul olan silahlı qruplaşma arasında toqquşma baş verib.

AZƏRTAC xəbər verir ki, bu barədə Sepah-ın nümayəndəsi polkovnik Qasım Həsənzadə məlumat yayıb. O bildirib ki, Əfqanıstandan İrana külli miqdarda narkotik vasitə keçirməyə çalışan qruplaşma ilə əsgərlər arasında silahlı toqquşma baş verib. Nəticədə 1 nəfər Sepah əsgəri həlak olub, 3 qaçaqmalçı məhv edilib və qaçaqmalçılığın qarşısı alınıb.

Baş verən insidentlə bağlı araşdırma aparılır. İranın hüquq mühafizə orqanları qaçaqmalçıların İrandakı əlaqələrini üzə çıxarmağa çalışırlar.

Rabil Kətanov

AZƏRTAC-ın xüsusi müxbiri

Tehran