AZƏRTAC-ın müxbiri Ankaradan xəbər verir ki, İraqın şimalındakı Kərkük şəhərindən 35 kilometr cənub-şərqdə neft kəmərinin qollarından birində yeni təxribat törədilmişdir.

İraqın Neft Sənayesi Nazirliyinin nümayəndəsi Sayeq əl-Cəburi bildirmişdir ki, noyabrın 3-də axşam baş vermiş partlayış nəticəsində neft kəməri dağılmış, lakin, xoşbəxtlikdən, yanğın baş verməmişdir. Hadisə yerinə gələn ABŞ hərbi qulluqçuları və İraq polisləri neft kəmərində daha bir neçə güclü partladıcı qurğu aşkar etmişlər. Həmin qurğular hər an partlaya bilərdi. Əl-Cəburinin sözlərinə görə, onların partlaması Kərkük bölgəsində ekoloji fəlakətə səbəb ola bilərdi.