İrina Lobojevski: Azərbaycandakı tərəfdaşlarla əlaqələrimizi genişləndirməyə çalışırıq
Bakı, 2 iyun, AZƏRTAC
Azərbaycan bazarı çox genişdir və biz buradakı tərəfdaşlarımızla işləməkdən məmnunuq. Hər il Azərbaycan şirkətlərində sifarişlər alaraq yüklərini vaxtında mənzil başına çatdırırıq.
Bu sözləri AZƏRTAC-a açıqlaması zamanı 31-ci Beynəlxalq Xəzər Neft və Qaz Sərgisində iştirak edən Belarusun “Redbriar” nəqliyyat şirkətinin aparıcı meneceri İrina Lobojevski deyib.
Onun sözlərinə görə, Azərbaycandakı tərəfdaşları Belarusdan idxal etdikləri malları “Redbriar” şirkət vasitəsilə daşıyırlar.
“İstər avtomobil, istərsə də dəmir yolu ilə yükdaşımaları həyata keçirən şirkətimiz Azərbaycana əsasən tikinti və ərzaq məhsulları ixracını həyata keçirir. Şirkətimiz Mərkəzi Asiya və Cənubi Qafqazda yeni bazarlar taparaq əməkdaşlıq əlaqələrini genişləndirib. Azərbaycanın “Abşeron Logistika Mərkəzi”, “SARA Logistika” şirkətləri ilə geniş əməkdaşlıq əlaqələrimiz var. Biz eyni zamanda işğaldan azad edilmiş Qarabağda həyata keçirilən yenidənqurma və bərpa işlərində də iştirak edirik. Şirkətlərin sifariş etdiyi tikinti materiallarını avtomobil və dəmir yolu vasitəsilə Rusiya ərazisindən tranzit keçirməklə Azərbaycana çatdırırıq. İxrac olunan yükün həcmindən asılı olaraq nəqliyyat növü seçilir. Nisbətən az yüklər avtomobillə, böyük həcmli yüklər isə dəmir yolu ilə çatdırılır”, - deyə İrina Lobojevski əlavə edib.
31-ci Beynəlxalq Xəzər Neft və Qaz Sərgisi “Caspian Oil and Gas” və 14-cü Xəzər Beynəlxalq Təmiz Enerji Sərgisi “Caspian Power” barədə danışan belaruslu menecer belə sərgilərin çox əhəmiyyətli olduğunu, burada biznesi genişləndirmək, yeni bazarlar tapmaq və əməkdaşlıq əlaqələrini artırmaq üçün geniş imkanlar yaradıldığını sözlərinə əlavə edib: “Sərgi yüksək səviyyədə təşkil olunub və burada dünyanın demək olar ki, bütün ölkələrindən şirkətlər təmsil olunur. Asiya, Avropa və ABŞ-dən, eləcə də MDB dövlətlərindən gələn şirkətlərlə tanış olmaq, qarşılıqlı faydalı əlaqələr qurmaq şirkətlərin maraq dairəsindədir. Azərbaycan Prezidenti İlham Əliyevin sərginin açılışında iştirakı xüsusilə əlamətdar oldu. Mən bir sıra dövlətlərdə keçirilən sərgidə iştirak etmişəm. Lakin ölkə liderinin sərginin açılışında iştirakını ilk dəfədir görürəm. Bu onu deməyə əsas verir ki, Azərbaycan Prezidenti ölkədə neft və qaz sahəsinə, eləcə də biznesin inkişafında maraqlıdır və bunun üçün geniş imkanlar yaradır. Biznesin inkişafı isə hər bir dövlətin iqtisadi inkişafı üçün əhəmiyyətlidir”.
Bölmənin digər xəbərləri
