Beynəlxalq Türk Akademiyası ilə Türkiyənin İslam Araşdırmaları Mərkəzi əməkdaşlıq edəcək
İstanbul, 2 iyun, AZƏRTAC
Beynəlxalq Türk Akademiyasının prezidenti akademik Şahin Mustafayevin rəhbərlik etdiyi nümayəndə heyəti İstanbulda səfərdədir.
AZƏRTAC xəbər verir ki, səfər çərçivəsində nümayəndə heyəti İslam Araşdırmaları Mərkəzini (İSAM) ziyarət edib, bu qurumun prezidenti, professor Mürtəza Bədir ilə görüşüb.
Danışıqlar zamanı tərəflər elmi əməkdaşlığın inkişaf perspektivlərini, birgə tədqiqat layihələrinin həyata keçirilməsini, eləcə də türkdilli xalqların ortaq tarixi-mədəni irsinin qorunması və təbliği ilə bağlı məsələləri müzakirə ediblər.
Ş.Mustafayev İSAM rəhbərliyini Beynəlxalq Türk Akademiyasının fəaliyyətinin əsas istiqamətləri ilə ətraflı tanış edib, həyata keçirilən elmi layihələri təqdim edib və türkdilli ölkələrin elmi-tədqiqat institutları arasında elmi əlaqələrin möhkəmləndirilməsi istiqamətində görülən işlərdən bəhs edib.
M.Bədir öz növbəsində Türk Akademiyasının fəaliyyətini yüksək qiymətləndirərək, onun Türk dünyasında elmin inkişafı və intellektual əməkdaşlığın gücləndirilməsində mühüm rol oynadığını vurğulayıb. O, İSAM-ın tərəfdaşlığın genişləndirilməsinə və elmi, həmçinin nəşriyyat sahələrində birgə təşəbbüslərin həyata keçirilməsinə hazır olduğunu bildirib.
Görüşün yekununda tərəflər birgə tədqiqatların aparılması və elmi layihələrin həyata keçirilməsini nəzərdə tutan Əməkdaşlıq Protokolunu imzalayıblar.
Beynəlxalq Türk Akademiyasının son elmi nəşrləri İSAM kitabxanasına hədiyyə edilib. Kitablar sırasında türkdilli dillərin terminoloji lüğətləri, həmçinin ümumtürk əlifbası ilə nəşr edilmiş Abayın “Nəsihət sözləri” və Çingiz Aytmatovun “Ağ gəmi” əsərləri yer alıb.
M.Bədir akademiyanın nümayəndə heyəti üçün tədqiqat mərkəzi və Türkiyənin ən böyük ixtisaslaşmış kitabxanalarından biri ilə tanışlıq turu təşkil edib, qonaqlara kitabxananın fondları, arxivləri və elmi infrastrukturu barədə məlumat verib.
Dostluq əlaqələrinin möhkəmləndirilməsi və elmi əməkdaşlığın inkişafının əlaməti olaraq, İSAM rəhbərliyi də Beynəlxalq Türk Akademiyasına bir sıra elmi nəşrlərini hədiyyə edib.
Bölmənin digər xəbərləri
