ABŞ və Britaniya əsgərləri İraqda hərbi təlim zamanı həlak olublar
Bakı, 2 iyun, AZƏRTAC
ABŞ və Böyük Britaniya rəsmiləri bazar ertəsi günü İraqda hərbi təlim zamanı bir Amerika əsgəri və bir Britaniya əsgərinin həlak olduğunu bildiriblər.
AZƏRTAC “The Associated Press” agentliyinə istinadla xəbər verir ki, ABŞ ordusunun “X” platformasında paylaşımında ölüm hadisəsinin bazar günü Şimali İraqın yarı-muxtar kürd bölgəsindəki Ərbil hava bazasında baş verdiyini bildirib. Bəyanatda deyilir ki, əsgərin şəxsiyyəti ailəsinə məlumat verildikdən sonra 24 saata qədər gizli saxlanılır.
Böyük Britaniya Müdafiə Nazirliyi ayrıca paylaşım edərək bildirib ki, Britaniya əsgərinin ailəsinə məlumat verilib.
ABŞ İraqda İŞİD qruplaşmasına qarşı mübarizə aparan qoşunların sayını azaldır. Lakin Vaşinqton kürdlərlə əlaqələrini gücləndirməyə çalışdığı üçün Amerika qüvvələri kürd bölgəsində iştirakını qoruyub saxlayıb.
ABŞ ötən ilin dekabr ayında kürd bölgəsinin paytaxtı Ərbildə yeni konsulluq kompleksinin açılışını edib və bu, Vaşinqtonun bölgədəki diplomatik və strateji fəaliyyətini vurğulayır.
Ölüm hadisəsi iki Amerika əsgərinin Mərakeşdə xidmətdən kənar istirahət gəzintisi zamanı uçurumdan yıxılaraq ölməsindən təxminən bir ay sonra baş verib. Onların 2 may tarixində illik çoxmillətli hərbi təlim olan “African Lion”da iştirak etdikdən sonra itkin düşdüyü bildirilir.
Bölmənin digər xəbərləri
