Prezident İlham Əliyevin Qarabağa hər səfəri dövlət-vətəndaş münasibətlərinin yüksək səviyyəsinin göstəricisidir - ŞƏRH
Bakı, 2 iyun, AZƏRTAC
Prezident İlham Əliyevin 28 May - Müstəqillik Günündə Qarabağa səfəri Azərbaycanın müasir dövlətçilik tarixində xüsusi siyasi və strateji məna daşıyan mühüm hadisə kimi qiymətləndirilməlidir. Çünki bu səfər yalnız dövlətimizin başçımızın regionlara ənənəvi işgüzar səfərlərindən biri deyil, həm də ölkənin ərazi bütövlüyünün və dövlət suverenliyinin tam bərpasından sonra Qarabağda həyata keçirilən genişmiqyaslı bərpa və yenidənqurma prosesinin yeni mərhələyə qədəm qoyduğunu nümayiş etdirən mühüm siyasi mesajdır.
Bu sözləri AZƏRTAC-a açıqlamasında politoloq Aytən Qurbanova söyləyib.
O bildirib ki, Müstəqillik Gününün məhz Qarabağ torpağında qeyd olunması xüsusi rəmzi və ideoloji məna daşıyır. Uzun illər işğal altında qalmış torpaqlarımızda bu gün Azərbaycan Bayrağının dalğalanması, yeni yaşayış məntəqələrinin salınması, müasir infrastrukturun qurulması və məcburi köçkünlərin doğma yurdlarına qayıdışı dövlət müstəqilliyinin real və praktiki nəticələrinin ən parlaq təzahürüdür. Səfər çərçivəsində Xocalıda “Qarabağ Tekstil Evi” MMC-nin istifadəyə verilməsi isə xüsusi diqqət çəkən hadisələrdən biri oldu. Bu layihə yalnız yeni sənaye müəssisəsinin açılması deyil, həm də Qarabağda iqtisadi həyatın bərpasının, özəl investisiyaların təşviqinin və dayanıqlı məşğulluq modelinin formalaşdırılmasının konkret və aydın göstəricisidir. Müasir texnologiyalar əsasında fəaliyyət göstərəcək müəssisənin həm daxili bazarın tələbatının ödənilməsinə, həm də ixrac potensialının artırılmasına xidmət etməsi Azərbaycanın qeyri-neft sektorunun inkişafı istiqamətində həyata keçirdiyi siyasətin uğurlu nəticələrindən biri kimi qiymətləndirilə bilər. Ümumilikdə Qarabağ və Şərqi Zəngəzurda yeni sənaye və istehsal müəssisələrinin yaradılması bu regionun ölkənin iqtisadi sisteminə reinteqrasiyasının əsas istiqamətlərindən birini təşkil edir. Həmçinin bu proses işğaldan azad edilmiş ərazilərə qayıdan vətəndaşların məşğulluğunun təmin olunmasına, sosial rifahın yüksəldilməsinə və iqtisadi fəallığın artırılmasına xidmət göstərməklə xüsusi önəm daşıyır.
“Dövlət tərəfindən sahibkarlar üçün tətbiq olunan vergi, gömrük və maliyyə güzəştləri isə özəl sektorun bölgəyə marağını artıraraq, Qarabağın investisiya cəlbediciliyini əhəmiyyətli dərəcədə yüksəldir. Digər tərəfdən isə Prezident İlham Əliyevin Qarabağa hər səfərində yerli sakinlərlə birbaşa ünsiyyət qurması, onların problemləri və ehtiyacları ilə yaxından maraqlanması dövlət-vətəndaş münasibətlərinin yüksək səviyyəsinin göstəricisidir. Müstəqillik Günündə bölgəyə köçürülmüş ailələr və kənd sakinləri ilə keçirilən görüşlər bir daha nümayiş etdirdi ki, Qarabağın bərpası yalnız infrastruktur və tikinti layihələri ilə məhdudlaşmır. Dövlət siyasətinin əsas məqsədi həmin ərazilərdə təhlükəsiz, dayanıqlı və yüksək həyat standartlarına malik yaşayış mühitinin formalaşdırılmasıdır. Səfər zamanı dövlətimizin başçısının çıxışlarında Azərbaycanın müstəqillik tarixinin mürəkkəb mərhələlərinə toxunması da mühüm siyasi məna daşıyır. Müstəqilliyin ilk illərində ölkədə müşahidə olunan siyasi böhranlar, idarəetmə zəifliyi və daxili qarşıdurmalar milli təhlükəsizlik üçün ciddi təhdidlər yaratmışdı. Lakin sonrakı dövrdə Ulu Öndər Heydər Əliyev tərəfindən həyata keçirilən ardıcıl dövlət quruculuğu siyasəti nəticəsində güclü dövlət institutları formalaşdırılmış, siyasi sabitlik təmin edilmiş və milli maraqlara əsaslanan müstəqil xarici siyasət kursu qurulmuşdu. Məhz bu amillər Azərbaycanın beynəlxalq nüfuzunun güclənməsində və milli maraqlarının səmərəli şəkildə müdafiəsində həlledici rol oynayır. İkinci Qarabağ müharibəsində qazanılmış tarixi Zəfər və sonrakı dövrdə həyata keçirilən lokal xarakterli antiterror tədbirləri nəticəsində ölkəmizin suverenliyinin tam təmin olunması isə Azərbaycanın inkişaf tarixində yeni mərhələnin əsasını qoydu”, - deyə A.Qurbanova vurğulayıb.
Politoloq əlavə edib ki, bu gün Qarabağda və Şərqi Zəngəzurda reallaşdırılan genişmiqyaslı layihələr hərbi-siyasi Qələbənin iqtisadi və sosial uğurlarla möhkəmləndirildiyini göstərir. Bu, təhlükəsizlik və sabitliyin iqtisadi yüksəlişə və sosial tərəqqiyə çevrilməsi istiqamətində həyata keçirilən strateji dövlət siyasətinin uğurlu nəticəsidir. Qarabağda həyata keçirilən bərpa və quruculuq prosesi Azərbaycanın beynəlxalq və regional nüfuzunun güclənməsinə də mühüm töhfə verir. Müharibədən sonra tamamilə dağıdılmış ərazilərin qısa müddətdə yenidən qurulması, müasir şəhərsalma konsepsiyalarının tətbiqi, “Ağıllı şəhər” və “Ağıllı kənd” layihələrinin reallaşdırılması Azərbaycanın iqtisadi potensialını, idarəetmə qabiliyyətini və strateji planlaşdırma imkanlarını nümayiş etdirir. Bu amillər ölkəmizin Cənubi Qafqazda lider mövqeyini daha da möhkəmləndirir.
“Müstəqillik Günündə dövlətimizin başçısının Qarabağa səfərinin digər mühüm siyasi mesajı isə dövlət, xalq və ordu birliyinin sarsılmaz xarakter daşıdığını göstərməsidir. Qarabağ artıq yalnız işğaldan azad edilmiş ərazi deyil, Azərbaycanın milli iradəsinin, gücünün, iqtisadi potensialının və gələcəyə hesablanmış inkişaf strategiyasının rəmzinə çevrilən strateji önəm daşıyan bölgədir. Hazırda bu bölgədə həyata keçirilən layihələr göstərir ki, Azərbaycan tarixi ədaləti bərpa etməklə kifayətlənməyib, eyni zamanda, həmin torpaqları ölkənin ən inkişaf etmiş və strateji əhəmiyyətli bölgələrindən birinə çevirməyi hədəfləyir. Bu baxımdan Prezident İlham Əliyevin Qarabağa səfəri dövlət suverenliyinin möhkəmləndirilməsi, milli həmrəyliyin gücləndirilməsi, iqtisadi inkişafın sürətləndirilməsi və tarixi ədalətin tam bərpası baxımından mühüm siyasi hadisə kimi dəyərləndirilməlidir. Bu səfər bir daha təsdiq etdi ki, Qarabağ və Şərqi Zəngəzur Azərbaycanın gələcək inkişaf strategiyasında yalnız bərpaolunan bölgələr deyil, həmçinin ölkənin iqtisadi qüdrətini, geosiyasi mövqeyini və milli gücünü artıran əsas inkişaf mərkəzləri kimi çıxış edəcək”, - deyə o bildirib.
Bölmənin digər xəbərləri
