Aqrar sahədə modernləşmə: Dövlət Proqramı Naxçıvan üçün də yeni perspektivlər açır
Naxçıvan, 2 iyun, AZƏRTAC
Cari il mayın 25-də Prezident İlham Əliyevin sədrliyi ilə keçirilən kənd təsərrüfatı məsələlərinə həsr olunmuş müşavirədə
dövlətimizin başçısının dərinməzmunlu nitqi bu sahənin ölkə siyasətində prioritet istiqamət olduğunu bir daha təsdiqləyir. Eyni zamanda, son illərdə müşahidə olunan müasir inkişaf perspektivləri yeni yanaşmaların və daha çevik idarəetmə mexanizmlərinin tətbiqini zəruri edir. Bu baxımdan, kənd təsərrüfatının inkişafına dair hazırlanan yeni Dövlət Proqramı ölkənin aqrar siyasətində yeni mərhələnin başlanğıcı kimi qiymətləndirilə bilər.
AZƏRTAC-ın bölgə müxbiri xəbər verir ki, Dövlət Proqramının icrası çərçivəsində kənd təsərrüfatının modernləşdirilməsi istiqamətində həyata keçiriləcək tədbirlər Naxçıvanda da istehsal imkanlarının genişlənməsinə mühüm təkan verəcək.
Naxçıvanda aqrar sahədə süni intellekt əsaslı həllərin tətbiqinə başlanılması nəzərdə tutulur.
Naxçıvan Muxtar Respublikası Kənd Təsərrüfatı Nazirliyinin şöbə müdiri Məhəmməd Zeynalov AZƏRTAC-a müsahibəsində bildirib ki, dövlətimizin başçısının kənd təsərrüfatı məsələlərinə dair keçirdiyi müşavirə aqrar sahənin inkişafı baxımından olduqca mühüm əhəmiyyət daşıyır. Müşavirədə və eləcə də, qəbul olunan yeni Dövlət Proqramında əsas diqqət ərzaq təhlükəsizliyinin möhkəmləndirilməsi, daxili istehsalın artırılması, su ehtiyatlarından səmərəli istifadə və innovativ texnologiyaların tətbiqinə yönəlib. Bu istiqamətlər muxtar respublika üçün də xüsusi aktuallıq kəsb edir və qarşıdakı dövr üçün yeni inkişaf mərhələsinin əsasını formalaşdırır.
O qeyd edib ki, cari ildə muxtar respublikada taxıl sahələrinin 20 min hektara çatdırılması hədəf olaraq müəyyən edilib. Son illər həyata keçirilən meliorasiya tədbirləri, müasir suvarma sistemlərinin tətbiqi, subsidiya mexanizmlərinin genişləndirilməsi və fermerlərə göstərilən dövlət dəstəyi əkin sahələrinin artırılması üçün əlverişli imkanlar yaradıb. Məqsəd yalnız əkin sahələrinin genişləndirilməsi deyil, həm də məhsuldarlığın yüksəldilməsi və daxili bazarın yerli istehsal hesabına daha etibarlı təmin olunmasıdır.
"Müşavirədə xüsusi diqqət çəkən məsələlərdən biri də kənd təsərrüfatında rəqəmsal texnologiyaların və süni intellektin tətbiqi ilə bağlı oldu. Artıq qısa müddət ərzində muxtar respublikada da süni intellekt əsaslı həllərin tətbiqinə başlanılması nəzərdə tutulur. Bu isə aqrar sahədə idarəetmənin daha çevik, dəqiq və səmərəli təşkilinə imkan verəcək. Ümumilikdə həyata keçirilən tədbirlər göstərir ki, qarşıya qoyulan əsas məqsəd yalnız ənənəvi kənd təsərrüfatını inkişaf etdirmək deyil, eyni zamanda, innovativ, rəqabətqabiliyyətli və müasir aqrar sistem formalaşdırmaqdır. Muxtar respublikanın mövcud potensialı, dövlət dəstəyi və tətbiq olunan yeni texnologiyalar yaxın illərdə kənd təsərrüfatının inkişafında daha mühüm nəticələrin əldə olunacağını deməyə əsas verir", - deyə nazirliyin rəsmisi əlavə edib.
Dövlət dəstəyi və düzgün aqrotexniki yanaşma yüksək məhsuldarlığa şərait yaradır
Həm müşavirədə, həm də Dövlət Proqramında xüsusilə taxılçılığın inkişafı və buğda istehsalında idxaldan asılılığın azaldılması məsələsi əsas hədəflərdən biri kimi önə çəkilib. Bu strateji xətt ərzaq təhlükəsizliyinin gücləndirilməsi baxımından mühüm əhəmiyyət daşıyır. Məhz bu kontekstdə Şərur rayonunun Düdəngə kənd sakini Mübariz Şirəliyevin təsərrüfat fəaliyyəti diqqət çəkir. O, uzun illərin təcrübəsinə əsaslanaraq torpağa bağlılıq və düzgün aqrotexniki yanaşma sayəsində yüksək nəticələr əldə edən fermerlərdəndir. Ötən il 150 tondan artıq taxıl istehsal edən təsərrüfatçı cari ildə 23 hektar sahədə əkin aparıb və yüksək məhsul əldə edəcəyinə inanır.
Fermer bildirib ki, əkinçilik digər sahələr kimi təcrübə və bilik tələb edir: "Torpağın xüsusiyyətlərini düzgün anlamaq və aqrotexniki qaydalara riayət etmək məhsuldarlığın əsas şərtlərindəndir. Xüsusilə suvarmanın vaxtında və normasında aparılması məhsulun keyfiyyətinə birbaşa təsir göstərir. Taxılçılıqda yüksək məhsuldarlığın əldə olunması üçün növbəli əkin sistemi mühüm əhəmiyyət daşıyır. Bu yanaşma həm alaq otlarının yayılmasının qarşısını alır, həm də bitkilərin daha sağlam inkişafına şərait yaradır. Eyni zamanda, gübrələmənin düzgün aparılması və alaq otlarına qarşı mübarizə məhsuldarlığın artırılmasında əsas amillərdəndir. Onu da vurğulamaq yerinə düşər ki, dövlət tərəfindən göstərilən dəstək, xüsusilə subsidiyalar və gübrə təminatı təsərrüfatların genişlənməsinə stimul verir və aqrar sahədə ümumi inkişafı sürətləndirir".
Mübariz Şirəliyevin sözlərinə görə, müasir kənd təsərrüfatı artıq yalnız fiziki əmək deyil, həm də bilik, planlaşdırma və düzgün idarəetmə tələb edən sahəyə çevrilib. Bu səbəbdən aqrotexniki yanaşmaların tətbiqi kənd təsərrüfatında uğurun əsas şərtlərindən biridir.
Təsərrüfatçı taxılçılıqla yanaşı, toxumçuluq fəaliyyəti ilə də məşğuldur. O, eyni zamanda, 16 hektar ərazidə şaftalı, ərik və gavalı bağları salıb. Bağın 1,2 hektarı intensiv üsulla qurulub və növbəti illərdə qalan sahələrin də mərhələli şəkildə intensiv formata keçirilməsi nəzərdə tutulur. Suvarmada isə əsasən müasir damcı üsulundan istifadə olunur ki, bu da suya qənaətlə yanaşı, məhsuldarlığın artırılmasına imkan verir.
Prezident İlham Əliyevin rəhbərliyi ilə aqrar sahədə həyata keçirilən dövlət siyasəti və 2026-2030-cu illəri əhatə edən Dövlət Proqramı çərçivəsində qarşıya qoyulan yeni hədəflər regionlarda, o cümlədən Naxçıvanda kənd təsərrüfatının inkişafına ciddi təkan verəcək. Müasir suvarma sistemlərinin genişləndirilməsi, subsidiyalar və infrastruktur layihələri istehsal imkanlarını artırmaqla yanaşı, fermerlərin fəaliyyətini stimullaşdırır. Düdəngə kənd sakini Mübariz Şirəliyevin təsərrüfatında əldə olunan nəticələr də göstərir ki, dövlət dəstəyi ilə aqrotexniki bilik və təcrübənin vəhdəti yüksək məhsuldarlığın əsas şərtidir. Bu yanaşma ölkədə ərzaq təhlükəsizliyinin gücləndirilməsinə və aqrar sektorun dayanıqlı inkişafına xidmət edir.
Müxbir - Nail Əsgərov
Bölmənin digər xəbərləri
