İşğaldan azad edilmiş ərazilərdə aparılan bərpa və quruculuq işlərinə dair kitab nəşr olunub
Bakı, 29 aprel, AZƏRTAC
AMEA-nın A.A.Bakıxanov adına Tarix və Etnologiya İnstitutunun Qarabağ müharibəsinin tarixi və Böyük Qayıdış hərəkatı şöbəsinin baş elmi işçisi tarix elmləri doktoru Nazim Məmmədovun “Azərbaycan Respublikasının işğaldan azad edilmiş ərazilərində bərpa və quruculuq prosesi (2021–2024-cü illər)” kitabı nəşr olunub.
İnstitutdan AZƏRTAC-a verilən məlumata görə, kitabda Azərbaycan tarixində parlaq qələbələr nəticəsində yaranmış yeni çağırışlar və reallıqlardan, hərbi sahədə qazanılmış Zəfərin diplomatik müstəvidə və quruculuq prosesində möhkəmləndirilməsi üçün müəyyənləşdirilmiş strateji hədəflərdən bəhs olunur. Eyni zamanda, işğaldan azad edilmiş ərazilərdə həyata keçirilən bərpa və quruculuq işləri ətraflı təhlil edilir.
Kitabda, həmçinin Ermənistan silahlı birləşmələrinin törətdiyi mina terroruna qarşı mübarizə, COP29 və işğaldan azad olunmuş ərazilərdə ekoloji sivilizasiya konsepsiyası, Ermənistanın Azərbaycana qarşı həyata keçirdiyi su terroru və onun aradan qaldırılması istiqamətində görülən tədbirlər, Qarabağ və Şərqi Zəngəzurda yaşıl enerji zonasının yaradılması və əhəmiyyəti, bölgənin zəngin turizm potensialı, yol-nəqliyyat infrastrukturunun bərpası və yenidən qurulması, eləcə də tarixi torpaqlara Böyük Qayıdış məsələləri geniş şəkildə tədqiq olunur.
Nəşrin elmi redaktoru Tarix və Etnologiya İnstitutunun Qarabağ müharibəsinin tarixi və Böyük Qayıdış hərəkatı şöbəsinin müdiri, tarix üzrə fəlsəfə doktoru Ədalət Mustafayevdir. Rəyçilər isə professor Mais Əmrahov, dosent Ədalət Qasımov və tarix üzrə fəlsəfə doktoru Rəna Baxışovadır.
Bölmənin digər xəbərləri
