İsveç gömrüyü rekord miqdarda narkotik qaçaqmalçılığının qarşısını alıb
Stokholm, 21 yanvar, Nərgiz Cəfərli, AZƏRTAC
İsveç gömrüyü bu ilin əvvəlində Helsinqborq limanında böyük bir narkotik partiyasının müsadirəsindən sonra rekord sayda kokain qaçaqmalçılığının qarşısını alıb.
AZƏRTAC xəbər verir ki, Ekvadordan gələn banan yükündə üç tondan çox kokain aşkar edilib ki, bu da əvvəlki rekorddan iki dəfə çoxdur. Mütəxəssislərin fikrincə, bu, qlobal qaçaqmalçılığın artması tendensiyasına uyğundur.
İsveç Gömrük Xidmətinin sözçüsü Martin Norellin sözlərinə görə, yükün həcmi onun təkcə İsveç deyil, həm də digər Skandinaviya ölkələri üçün nəzərdə tutulduğunu göstərir. Daha ucuz kokain istehsalı və yüksək tələbat qaçaqmalçılığın kəskin artmasına səbəb olub, Helsinqborq limanı isə Cənubi Amerikadan geniş meyvə idxalı baxımından və əlverişli coğrafi mövqeyinə görə cəlbedici marşrut olaraq qalır.
“Bəzi əməliyyatlar son dərəcə mürəkkəbdir, sanki Hollivud filmindəki kimidir. Əvvəllər Öresund körpüsündə bir avtomobildən on kiloqram marixuana müsadirə edə bilsək, inanılmaz dərəcədə məmnun olardıq. İndi isə bu, təəccüb hissi doğurmur”, - deyə M. Norell qeyd edib.
Müsadirənin miqyasına baxmayaraq, heç kim həbs olunmayıb və gömrük xidmətinin məlumatına görə, əməliyyatda təkcə İsveçdəki deyil, həm də xaricdəki cinayətkar şəbəkələrin iştirakı istisna olunmur. Müsadirə edilən yükün dəyəri təxminən üç milyard kron (285 milyon dollara yaxın) qiymətləndirilir.
Bölmənin digər xəbərləri
