DÜNYA
İsveç Türkiyədən müdafiə sənayesi məhsulları idxalına icazə verib
Bakı, 27 dekabr, AZƏRTAC
İsveç müdafiə sənayesi məhsullarının tədarükü üçün Türkiyə kompaniyalarına icazələr verməyə başlayıb.
AZƏRTAC “Yeni Şafak” qəzetinə istinadla xəbər verir ki, Türkiyə xarici işlər nazirinin müavini Burak Akçapar bu barədə parlamentdə İsveçin NATO-ya qəbulu ilə bağlı protokolun müzakirəsi zamanı bildirib.
“İsveç müdafiə sənayesi məhsulları sahəsində Türkiyəyə qarşı tətbiq olunan embarqonu ləğv edib. Ankara Stokholmun NATO-ya üzvlüklə bağlı ərizəsinin təsdiqlənməsi prosesinə başladıqdan sonra türk kompaniyalarının müraciətlərinə müsbət cavab verilib”, - deyə Akçapar bildirib.
Xatırladaq ki, İsveç 2019-cu ildə Türkiyədən müdafiə sənayesi məhsullarının tədarükünə qadağa qoyub. 2022-ci ilin sentyabrında İsveçin üzvlük müraciətinə baxılması ilə embarqo aradan qaldırılıb.
Türkiyə Parlamentinin Xarici Əlaqələr Komissiyası dekabrın 26-da İsveçin NATO-ya qəbuluna dair ratifikasiya protokolunu təsdiqləyib. Sənəd bundan sonra parlamentin ümumi iclasında səsverməyə çıxarılacaq.
Hazırda bütün alyans üzvlərindən yalnız Türkiyə və Macarıstan İsveçin NATO-ya üzvlüklə bağlı müraciətini təsdiq etməyib.
