İsveç universitetinin professoru irqçi ifadələr işlətməkdə ittiham olunub
Stokholm, 1 avqust, Nərgiz Cəfərli, AZƏRTAC
İki tələbə Halmstad Universitetinin professorunu dərs zamanı irqçi ifadələr işlətməkdə ittiham edib. Onlar iddia edirlər ki, professor qaradərililərin tənbəl və aşağı IQ-yə malik olduğunu deyərək, eyni zamanda ağdərililəri Yaxın Şərq və Afrika ölkələri sakinlərindən fərqli olaraq fəzilətli və “faydalı, zəhmətkeş və sadiq” kimi təsvir edib.
AZƏRTAC xəbər verir ki, universitet hadisə barədə Dövlət Hesabatlılıq üzrə Şuraya məlumat verib, o da öz növbəsində işi prokurorluğa göndərib. Prokurorluq professoru hər hansı bir etnik qrupa qarşı təhrikdə ittiham edib.
Müəllim ittihamları rədd edərək, onları biabırçı və əsassız adlandırıb.
“Bunlar saxta ittihamlardır! Qalan tələbələr ittihamların həqiqətə uyğun olmadığını göstərən yazılı ifadələr göndərdilər. Onlar məhkəmə qarşısına çıxmağa hazırdırlar. Əsl xəbər odur ki, rektor heç bir sübut olmadan ittihamları Dövlət Hesabatlılıq üzrə Şuraya göndərib”, - deyə universitetin daxili araşdırmanın bitməsini gözləməli olduğunu düşünən professor bildirib. Professor onu da hesab edir ki, universitet rektoru hadisəni düzgün tənzimləmədiyi üçün istefaya getməlidir.
Bölmənin digər xəbərləri
