İsveçdə cinayətkar qruplaşmalarla bağlı cəzalar sərtləşdirilir
Stokholm, 16 yanvar, Nərgiz Cəfərli, AZƏRTAC
İsveç hökuməti mütəşəkkil cinayətkar qruplaşmalar çərçivəsində törədilən cinayətlərə görə cəzaların sərtləşdirilməsini nəzərdə tutan genişmiqyaslı qanunvericilik dəyişiklikləri təklif edib.
AZƏRTAC xəbər verir ki, təşəbbüsə əsasən, belə cinayətlərə görə cəza müddətlərinin ikiqat artırılması, ağır seksual cinayətləri təkrar törədən şəxslər üçün isə istisna hallarda ömürlük azadlıqdan məhrumetmə cəzasının tətbiqi nəzərdə tutulur.
Qanun layihəsi atışma, partlayış, dələduzluq və sosial təminat sisteminə qarşı cinayətlər də daxil olmaqla, geniş cinayət kateqoriyalarını əhatə edir. Eyni zamanda, cinayət şəbəkələrində rəhbər mövqedə olan şəxslər üçün daha sərt sanksiyalar tətbiq ediləcək və cinayət törədənlərin gənc yaşı yüngülləşdirici hal kimi nəzərə alınmayacaq.
Bildirilib ki, təxminən 50 maddəni əhatə edən dəyişikliklərin bu il iyulun 3-dən qüvvəyə minməsi planlaşdırılır.
“Biz istəyirik ki, cinayətkarlar dəmir barmaqlıqlar arxasında olsunlar, qanuna əməl edən vətəndaşlar isə qorxmadan küçəyə çıxa bilsinlər”, – deyə İsveçin ədliyyə naziri Qunnar Strömmer qeyd edib.
Bölmənin digər xəbərləri
