İsveçin milli təhlükəsizlik müşaviri ətrafında qalmaqal davam edir
Stokholm, 23 yanvar, Nərgiz Cəfərli, AZƏRTAC
İsveçin milli təhlükəsizlik müşaviri Henrik Landerholm yeni qalmaqalın mərkəzindədir.
Yerli media tərəfindən verilən açıqlamalar məxfi məlumatlarla ehtiyatsız davranma və şəxsi səyahətlər üçün vergi vəsaitlərindən istifadə də daxil olmaqla çoxsaylı qanun pozuntularına işarə edir.
AZƏRTAC xəbər verir ki, müxalifət partiyaları - Sosial Demokratlar, Sol və Yaşıllar onun təcili istefasını tələb edirlər.
Ən çox rezonans doğuran hallar arasında İsveç Radiosunun binasında H.Landerholm tərəfindən unudulmuş dəftərlə bağlı insidentdir. O, sənədi şəxsən götürmək əvəzinə, onu gətirmək üçün bir taksi sürücüsünü göndərib. Mütəxəssislər bu yanaşmanı milli təhlükəsizlik baxımından vacib olan məlumatlara çıxışı olan şəxs üçün qəbuledilməz adlandırıblar.
Bundan başqa, məlum olub ki, H.Landerholm dəfələrlə Berlinə şəxsi məqsədlərlə, lakin vergi ödəyicilərinin hesabına səfər edib. “Aftonbladet”in məlumatına görə, o, bu vəzifəyə təyin olunduqdan sonra vaxtilə tərəfdaşının yaşadığı Almaniya paytaxtına ən azı doqquz dəfə səfər edib. Onların bəziləri rəsmi olaraq işgüzar səfərlər siyahısında idi, lakin sonradan məlum olub ki, H.Landerholm həftəsonu Berlində qalıb və ya şəxsi səbəblərdən ezamiyyətləri başa vurub.
Yalnız jurnalistlərin suallarından sonra o, təxminən 10.000 kron (900 dollar) məbləğində uçuşlar, qatar biletləri və kuryer xidmətləri xərclərini ödəyib. H.Landerholm özü bildirib ki, hökumət kansleri gələcəkdə oxşar səhvlərə yol verməmək üçün rəsmi səfər qaydalarına yenidən baxıb.
Yaşıllar Partiyası H.Landerholma etimad göstərməyib.
“Biz Baş nazirin onu bu vəzifəyə uyğun namizəd hesab etməyə davam edə biləcəyini başa düşmürük”, -deyə partiyanın həmsədri Daniel Hellden bildirib.
Mötədil siyasətçilər sırasından da tənqidlər eşidilir. Mənbələr bildirir ki, Landerholm şəxsi əlaqələri sayəsində vəzifəsində qalır: o, Baş nazir Ulf Kristerssonun uşaqlıq dostu və partiya katibi Karin Enströmün qardaşıdır.
“Əgər belə səhvləri bu cür əlaqəsi olmayan biri etsəydi, o, çoxdan işdən çıxarılardı”, - deyə müxalifətçilər hiddətlə bildirirlər.
U.Kristersson özü H.Landerholmun davranışının qəbuledilməz olduğunu etiraf edib, lakin hökumət kanslerinin təhlükəsizlik departamentinin qiymətləndirməsinə etibar etdiyini bildirib. Amma müxalifət hesab edir ki, hökumətə etimadı qorumaq üçün Baş nazir bu təyinata görə məsuliyyət daşımalı və H.Landerholmu vəzifəsindən uzaqlaşdırmalıdır.
Bölmənin digər xəbərləri
